kultura
ZINEMALDIA
Zazpi herrialdetako eskoletako 13 film labur izango dira Zinemaldiko Nesten
AGENTZIAK | ERREDAKZIOA
Nesteko aurtengo edizioan Ameriketako Estatu Batuetatik datozen hiru film labur emango dituzte, eta gainerakoak Argentina, Alemania, Erresuma Batua, Kuba eta Indiako eskoletatik etorriko dira.
-
"Ella i jo" filma. Argazkia: Zinemaldia.
Zazpi herrialdetako zinema eskoletako ikasleen 13 film laburrek parte hartuko dute Donostiako Zinemaldiko Nest sailean. Horien artean bat Donostiako Elias Querejeta Zine Eskolak (EQZE) aurkeztuko du, eta bestea Madrilgo Nazioarteko Argazki eta Zinema Zentroak (EFTI).
Nestek aurrez aurreko formatuari eutsiko dio, eta irailaren 21etik 23ra egingo da, Zinemaldiaren 68. edizioaren barruan. Aurrez aipatutako lanez gain, Ameriketako Estatu Batuetako zentroetatik datozen hiru film labur emango dituzte, eta gainerakoak Argentina, Alemania, Erresuma Batua, Kuba eta Indiako eskoletatik etorriko dira.
Bigarren urtez jarraian, EQZEk aurkeztutako film labur bat eskainiko du Nestek. Titulua "Ella i jo" da eta Jaume Claret Muxart bartzelonarrak zuzentzen du, Donostiako eskolako lehen promozioan Sorkuntza graduondokoa egin zuena.
Film horretan, Queralt, Bartzelonako margolari bat, bere alaba Gemmarekin telefonoz hitz egiten saiatzen da, bizitza berri bat hasi baitu Atenasen, margotzetik bizi den estudio batean.
Ashmita Guha, Francisca Jimenez Ortegate, Rafael Manuel, Elsa Rosengren, Alisha Mehta, Octavio Almeida, Santiago Barzi, Mila Zhluktenko, Kevin Vu, Toby Auberg eta Haohao Yan dira beste egileak.
Zine arloko pertsona ospetsu bat izango da epaimahaiko buru, eta aurten, salbuespen gisa, azken edizioetako hiru ikasle irabazleek osatuko dute epaimahaia. Epaimahaiak erabaki beharko du Nesteko Film Laburrik Onenaren Saria, 10.000 euroko balioa duena.
Zinemaldiaren 68. edizioan, New Directors atalak "La última primavera" filmaren estreinaldia hartuko du, Isabel Lamberti zinemagile alemaniarraren estreinaldia, 2015ean Torino Award de Nest saria irabazi zuena.
Grigory Kolomytsev zinemagile errusiarraren "Chupacabra" New Directorsen ere izango da; 2016an eta 2018an Nesten parte hartu zuen, eta 2018an Ikusmira Berrien egoitzetan egon zen.
Iaz, Oren Gerner zinemagile israeldarra izan zen New Directorsen "Africa" filmarekin lehiatu zena, Nesten "Greenland" bere graduazio film laburrarekin arrakasta lortu eta bost urtera.
Aurreko edizioetan bezala, Tabakalerak Zinemaldiko egunak baliatuko ditu azken urteetan Nest sailean sarituak izan diren film laburrak begiztan proiektatzeko.
