Guggenheimek 1,3 milioi bisitari izan ditu 2017an, iaz baino % 13 gehiago

Guggenheim Bilbao Museoak "bere historiako urterik onena" bizi du bukatu berri den 2017an, bere 20. urteurrenean, eta 1.322.611 bisitari jaso ditu, eta, bi hamarkadatako ibilbidearen ondoren, "proiektu erakargarria" izaten jarraitzen duela nabarmendu dute bere arduradunek.

Bisitariei dagokionez, errekor historikoa lortu da, eta museoa ireki ondorengo lehen urte osoa izan zen 1998ko kopurua gainditzera iritsi da 1.322.611 bisitarirekin, aurreko urtean baino 153.207 gehiago eta orain arte marka zeukan 1998an baino 15.411 bisitari gehiago.

Gainera, 300.000 pertsonak baino gehiagok ikusi zuten 'Reflections' zuzeneko ikuskizuna. Frank Gehryren eraikina mihise bilakatu zen lau gauez, "museoaren eta hiriaren historia erakusteko bidaia sentsorial batean".

Zuzenean jarraitu zuen publikoaz gain, mundu guztiko milioika pertsonak komunikabideen bidez ikusteko aukera izan zuten. Gainera, sare sozialetan ikaragarri zabaldu zen.

Iragan abenduan museoa 'Bilboko Enbaxadore' izendatu zuen Udalak, eta azaroan 'European Cultural Brand of the Year' saria jaso zuen Berlinen, Cultural Brands erakundearen eskutik. Era berean, 'Premio Cambio 16 a las Artes' lortu du.

Compromiso y Transparencia Fundazioak 'Estatuko Museorik gardenena' izendatu zuen irailean, hirugarren urtez jarraian. Ekainean Laus diseinu bi sari jaso zituen, horietako bat XX. Urteurrena webguneagatik.

Bisitarien jatorria eta eragin ekonomikoa

Jatorri geografikoa kontuan hartuta, aurreko urteetan bezala, atzerritarren portzentaje altua mantendu da, bisitari guztien %62 izanik, gehienbat Frantziatik (%16), Britainia Handitik (%7), Alemaniatik (%5), AEBetatik (%5) eta Italiatik (%4) helduak. Arabako, Bizkaiko eta Gipuzkoako bisitarien portzentajea %21 izan da, aurreko urtean baino %10 gehiago, eta Espainiako autonomia erkidegoetako bisitariena %17.

Halaber, atal honetan Bizkaiko Foru Aldundiak sustatutako 'Lurraldea zabalduz' ekimena nabarmendu da. Adin nagusiko bizkaitarrek urrian museoa doan bisitatzeko gonbidapena jaso zuten, eta 113.966 bizkaitarrek aukera hori baliatu zuten.

Guggenheim Bilbao Museoaren funtzionamenduak daukan eragin ekonomikoari dagokionez, 2017koek aurreko urteetako datuak gainditu dituzte.

Horrela, museoaren jarduerarekin EAEn sortutako eskariaren guztizkoa 495,5 milioi eurokoa izan da, eta 433,7 milioi euroko ekarpena egin zaio Barne Produktu Gordinari (BPG).

Kopuru horiei esker, 67,2 milioi euro gehiagoko diru sarrera egin da EAE ogasun publikoetan. Gainera, museoaren jarduerak 9.282 lanpostu mantentzen lagundu du.