Jaurlaritzak Donostia 2016ri egingo dion diru-ekarpena % 77 jaitsi du

Eusko Jaurlaritzak % 77an murriztu du Donostia 2016 Europako Kultura Hiriburutzaren proiekturako 2013rako aurreikusitako diru-ekarpena, Ikerne Badiola (Bildu) Foru Aldundiko Kultura diputatuak jakitera eman duenez.

Foru arduradunak Batzar Nagusiei jakinarazi dienez, Eusko Jaurlaritzako ordezkari batzuekin duela gutxi izandako bilera batean, haiek proiektu berrirako egingo duten ekarpena 350.000 eurora igo da, Iñigo Urkulluren Gobernuko aurrekontuen zirriborroan, eta, horrek % 77ko murrizketa esan nahi du, Hiriburutza kudeatzen duen Fundazioko patronatuak onartutako finantzaketa planean aurreikusitako kopuruari dagokionez.

Badiolaren hitzetan, datu "ofiziosoak" dira, eta, ondorioz, alderdi guztiei Autonomia Erkidegoko aurrekontuetan "bide beretik joatea" eskatu die, egoera hau konpondu ahal izateko. Egungo egoera ekonomikoa zein den jakin badakiela adierazi ostean, Badiolak esan du Donostia 2016ko finantzaketan horrelako murrizketa izateak "ezbaian" jartzen duela proiektua.

Diputatuak azaldu duenez, Donostia 2016ren Patronatuaren parte diren erakunde guztiek, Aldundiak, Eusko Jaurlaritzak, Kultura Ministerioak eta Europar Batasunak 2020 urtera arte bakoitzak egingo duen diru-ekarpenaren "koadroa" adostu zuten. Horregatik, Gipuzkoako Aldundiko aurrekontuetan 2013rako 1,5 milioi euro baino gehiagoko ekarpena dago, eta horrekin "hitza bete" duela gaineratu du.

Halaber, Badiolak esan du Kultura Ministerioak Fundazioan sartzea erabaki zuela, baina, proiektuarekin konpromisoa duen adierazpenak egitetik urrunago, 2013rako horren ekarpen ekonomikoa "zero" dela nabarmendu du, eta 2014rako Hiriburutzara zuzendutako dirurik ez jartzearen beldur dela azaldu du.

Europako Kultura Hiriburutzak 2020 urtera arte 72 milioi euroko aurrekontua duela gogoratu du, baina egun "bost erakundeetatik biren inplikazioa zein izango den ez dakigu", nabarmendu du, Eusko Jaurlaritzari eta Gobernu zentralari dagokionez. Euren konpromisoa diruan bilakatu dutenak Bilduk gobernatutakok direla azaldu du: Donostiako Udala eta Aldundia.

Badiolaren hitzen berri izan ostean, alderdi sozialistak Juan Karlos Izagirre Donostiako alkateari 2016ko Europako Kultura Hiriburutzaren Batzordea berehala deitzea eskatu dio, Eusko Jaurlaritzaren murrizketa aztertzeko, "proiektuak izugarrizko muturrekoa jasan" duelako.