Musika
MDNA Tour
Madonnaren euskal ikuskizuna
Euskal hirukoteak Poparen Erregina lagunduko du euskal kutsuko bira honetan: ikuskizuna hirukotea eszenatoki gainean abesten dagoela hasten da eta Madonna hainbat kantutan laguntzen dute.
Euskal ikutua du Madonnaren MDNA bira berriak. Bagenekien Iparraldeko hirukoteak Poparen Erreginaren ikuskizun berrian parte hartuko zuela eta 'Sagarra jo' abestiarekin probatzen ikusi genituen. Baina bira Tel Aviven hasi zen atzo eta kolaborazioaren irudiak ditugu.
Ikuskizunaren momentu batean ("Open your heart" kantuan), "Euskal Herritik, Kalakan hirukotea" aurkezten du Poparen Erreginak, txalo bero bat eskatuz. Gero, bira Israelen hastearen zergatia azaltzen du (polemika handi piztu da mundu osoan) eta bake, errespetu eta bizikidetza mezu bat botatzen du. "Open your heart" abestia "Sagarra jo" kantuaren bertsio batekin amaitzen da.
Madonna ekainaren 20an eta 21ean izango da Bartzelonan.
