Musika
Donostiako Orfeoia
Donostiako Orfeoiak nazioarteko lau bira egingo ditu aurten
Agentziak | Erredakzioa
Abesbatza Herbehereetan, Belgikan, Frantzian eta Alemanian arituko da guztira 45 kontzertu emango duen urte batean.
Donostiako Orfeoiak jarduera bizia izango du 2018an: 45 emanaldi egingo ditu guztira, iaz baino 18 gehiago, eta Herbehereetan, Bruselan, Frantzian eta Alemanian arituko da, besteak beste, Rotterdameko eta Municheko orkestra filarmonikoekin.
Aurten, gainera, abesbatzaren 120. urteurreneko kontzertua ere egingo dute, iaz bertan behera gelditu baitzen, zuzendariaren gaixotasun baten ondorioz.
Martxoaren 23 eta 25ean, Rotterdam eta Bruselan, Mahlerren 8 zenbakiko Sinfonia joko dute Herbehereetako hiri horretako filarmonikoarekin, Yannick Nezet-Seguinek zuzenduta.
Ekainaren 8 eta 9rako, Frantziako Tolosan dute hitzordua, non Verdiren Requiema joko baitute hiri horretako Kapitolioko Orkestra Nazionalarekin, Tugan Sokhiev maisuaren aginduetara.
Nazioarteko biraren hurrengo hitzordua Carcassonneko Jaialdian izango da korua: Carmina Burana Carl Orffen lana joko dute bertan, uztailaren 5ean, Michele Gambak zuzenduta.
Azkenik, urriaren 13an Donostiako Orfeoia Municheko Filarmonikoari eta Tolz umeen abesbatzari batuko zaio Alemaniako hiriko aireportuan, Valery Gergieven aginduetara Mahlerren Zortzigarrena jotzeko.
