Oskorrik gaur ekingo dio agur birari, Getxon

Oskorri taldeak gaur ekingo dio 45 urteko ibilbideari amaiera emango dion "Hauxe da despedidia!" agur birari; zehazki, Folk Getxo jaialdiaren barruan eskainiko du kontzertua, 20:00etatik aurrera. Gaurko kontzerturako sarrerak agortuta daude.

Gaurkoaren ondotik, folk taldea zuzenean ikusteko beste sei aukera izango dira:

Baionan, urriaren 10ean, 18:00etan, Lauga kiroldegian

Vitoria-Gasteizen, urriaren 17an, 20:30ean, Aitzina Folk jaialdian

Donostian, urriaren 25ean, 20:30ean, Victoria Eugenian

Iruñean, azaroaren 7an, 20:00etan, Baluarten, Nafarroa Oinezen alde

Maulen, azaroaren 14an, 18:30ean, Jai Alai frontoian

Bilbon, azaroaren 22an, 19:30ean, Arriaga antzokian

Oskorrik 45 urteko ibilbide oparo eta etengabea itxiko du horrela. Gabriel Arestiren hauspo zorrotz eta indartsuaren laguntzaz diktadurapean jaio zen proiektuak 3.000 kontzertu eman eta 500 kantu grabatu ditu harrezkero.

Euskal tradi­zio literario eta musikala denon eskura jarri du taldeak ia mende erdiko ibilian, eta euskal belaunaldi askoren soinu-banda izan da.