Bertsolaritza
Txapelketa Nagusia
Nerea Ibarzabal, irabazle Zumaiako final-laurdenean
E. Lotina | eitb.eus
Azaroaren 4an Maule-Lextarren jokatuko den finalaurrekorako tokia lortu du Markina-Xemeingoak. Datorren larunbatean jokatuko da Tolosako Beotibar pilotalekuan azken final laurdena.
Zumaiako Aitzuri pilotalekua bertsozalez bete zen igandean. Sarrerak amaituta zeuden ostegunetik. 700 lagunek jarraitu zuten final-laurdeneko saioa bertatik bertara, Bertsozale Elkarteak jakitera eman duenez.
Marta Ugartek aurkeztu zuen saioa, eta berarekin izan ziren oholtzan sei protagonistak: Ibon Ajuriagojeaskoa, Arkaitz Oiartzabal Xamoa, Miren Artetxe, Nahikari Gabilondo, Nerea Ibarzabal eta Asier Otamendi.
Binaka aritu ziren lehenik, zortziko handian eta txikian; puntu-erantzunetan, gero; binaka berriro ere, hamarreko txikian; eta, azkenik, kartzelako lanarekin biribildu zuten eginbeharrekoa, egokitu zitzaien gaiari helduta.
Lana amaituta eta puntuazio osoak batutakoan, epaimahaiaren erabakia jakinarazi zuen Ugartek: Ibarzabalek irabazi zuen Zumaiako final-laurdena, 698,5 punturekin; 661,5 puntu eskuratu zituzten Nahikari Gabilondok eta Miren Artetxek; 627,5 puntu, Arkaitz Oiartzabal Xamoa-k; 617,5 puntu, Asier Otamendik; eta 616, Ibon Ajuriagojeaskoak.
Zumaiako saioa irabazita, azaroaren 4an Maule-Lextarren jokatuko den finalaurrekorako tokia lortu du Markina-Xemeingoak. Beñat Gaztelumendi izango du bertsokide, oraindik zehazteko dauden beste lau parte hartzailerekin batera.
Azken final-laurdena datorren larunbatean jokatuko da, Tolosako Beotibar pilotalekuan.
