Artea
20. urteurrena
Nestor Basterretxearen obrak eta Itziar Okarizen performance bat, Artiumen urtebetetzea ospatzeko
N. V. | EITB Media
Euskal Herriko Arte Garaikidearen Museoa 2002ko apirilaren 26an ireki zuten. Apirilean eta maiatzean, museoko sarrera doakoa da publiko guztiarentzat.
Apirilaren 26an, asteartearekin, 20 urte beteko ditu Artium Euskal Herriko Arte Garaikidearen Gasteizko museoak.
Hori ospatzeko, 18:30ean, Itziar Okariz artistak 2. kapitulua, V. W. performancea eskainiko du; artistak behin eta berriz irakurriko du Virginia Wolfen Gela bat norberarena lanaren pasarte bat (paisaia baten deskribapena), errepikapen bakoitzean hitz bat kenduta.
Errepikatu ahala, testua urrituz joango da, erabat desagertu arte.
Amaitzeko, 19:00etan, Nestor Basterretxearen lau obra jarriko dituzte museoaren kanpoaldean. Formatu handiko lau eskultura dira, artista zenaren familiak lagatakoak, altzairuzkoak eta polikromatuak. Hilarri tradizionalak gogorarazten dituztela azaldu dute museoaren arduradunek.
Piezak Artium museoaren barruko plazako bi puntutan kokatuko dituzte.
Gainera, apiril-maiatzetan doakoa da Gasteizko museorako sarrera, urtebetetzea ospatzeko.
