Bilbora dator 'Avenue Q' musikala, helduentzako 'Sesame Street' bitxia

Avenue Q musikala Bilbon, Arriaga Antzokian, izango dugu Aste Nagusian. Abuztuaren 12tik irailaren 4ra bitartean taularatuko dute helduentzako ikuskizuna.

''''Sesame Street'''' saio ezagunari omenaldi berezia egiten dio musikalak, eta aktoreak eta panpinak biltzen ditu taula gainean. Hori bai, helduentzako gaiak lantzen dituzte pertsonaiek. Izan ere, inozentzia galtzeko prozesuaren inguruko parabola da musikala, eta arrazakeria, langabezia, pornografia eta gisa horretako gaiak jorratzen ditu.

Broadwayn estreinatu zuten musikala, 2003an; eta, oraindik taula da New Yorkeko auzoan. 2004an hiru Tony sari eskuratu zituen: musikal onenaren saria, libreto onenaren saria eta musika onenaren saria. Askoren ustez, musikalak lantzeko aro berria zabaldu zuen lan honek, eta Broadwayn asko dira Avenue Q lanaren ildoei jarraitzen dioten musikalak.

Hezur-haragizko pertsonaiak panpinekin uztartzen ditu, gaur eguneko istorio bat kontatzeko. Egungo arazoei aurre egin behar dion jende arruntaren istorioa lantzen du, gidoi ganberro bati jarraituz.

''Broadway''n, Las Vegasen eta AEBetako beste hainbat hiritan antzeztu dute, eta Londresen, Suitzan, Filipinetan, Israelen, Mexikon, Errusian, Frantzian, Australian, Zeelanda Berrian, Brasilen, Turkian, Italian eta Argentinan ere taularatu dute.

Yllana antzerki taldeak zuzendu du espainiar moldaketa, eta denboraldia amaitu berri dute Madrilen. Guztira 250 emanaldi eskaini dituzte bertan, eta 80.000 ikusle bildu dituzte. Uda honetan Arriaga Antzokira ekarriko dituzte ''''Broadwayko eta Londreseko auzorik famatueneko pertsonaia guztiak''''.

Sarrerek 12 eta 35 euro bitarteko prezioa dute, eta ekainaren 2an jarriko dituzte salgai, Arriaga Antzokiko leihatiletan, teatroarriaga.com webgunean, 944 310 310 telefonoan eta BBKren orotariko kutxazainetan.