Frantziako Tourra 2024
3. etapa
Demi Volleringek irabazi du Rotterdameko erlojupekoa, eta Frantziako Tourreko lider jarri da
EITB MEDIA
SD Worx-Protime taldeko txirrindulari herbeheretarra izan da onena astearte arratsaldean jokatutako hirugarren etapan, eta sailkapen nagusiko aurreneko postura igo da. Lorena Wiebes Volleringen taldekidea da bigarren tokian, hiru segundora.
-
Demi Vollering, pozik, podiumean, maillot horia jantzita. Argazkia: EFE.
Albisteak (2)
SD Worx-Protime taldeko Demi Vollering txirrindulari herbeheretarrak irabazi du 2024ko Frantziako Tourreko hirugarren etapa, Rotterdamen jokatu den 6,3 kilometroko erlojupekoa, astearte arratsaldean, eta, horrenbestez, lasterketako lider berria da eta maillot horia jantzi du; hirugarren etapa amaitu arte, DSMko Charlotte Koolek zuen maillot horia, kontuan izanik astelehenean lehenengo etapa bereganatu zuela, eta astearte goizean bigarrena ere bai.
2023ko Frantziako Tourrean erdietsitako garaipena berrestea du helburu Volleringek. Erlojupekoan, bost segundoko aldea lortu du Canyon taldeko Chloe Dygertekiko (egungo munduko txapelduna da Dygert), eta FDJko Loes Adegeestekiko; sailkapen nagusian, SD Worx taldeko ziklistak Lorena Wiebes taldekidea du atzetik, bigarren postuan, hiru segundora, eta Dygert bost segundora dabil.
Frantziako Tourrean lehenengo aldiz dabilen Laboral Kutxa-Euskadi Fundazioa taldeak mendiko sailkapeneko maillota duela jarraitzen du, Cristina Tonettiri esker. Erlojupekoan, Usoa Ostolazak Volleringek baino 39 segundo gehiago baliatu ditu, eta Ane Santestebanek 51.
Asteazkenean, 2024ko Frantziako Tourreko laugarren etapa izango da jokoan. Jardunaldiak 122,7 kilometro izango ditu, Valkenburgen hasiko da, eta Liejan amaitu.
Etapako sailkapena
1 - VOLLERING Demi (SD Worx) 7:25
2 - DYGERT Chloe (Canyon) + 0:05
3 - ADEGEEST Loes (FDJ) d. b.
4 - KERBAOL Cedrine (CERATIZIT) m. t.
5 - FAULKNER Kristen (EF) + 0:06
6 - VAN DIJK Ellen (Lidl) d. b.
7 - WIEBES Lorena (SD Worx) + 0:09
8 - BREDEWOLD Mischa (SD Worx) d. b.
9 - NORSGAARD Emma (Movistar) + 0:10
10 - HENDERSON Anna (Visma) + 0:11
Sailkapen nagusia
1 - VOLLERING Demi (SD Worx) 4:27:54
2 - WIEBES Lorena (SD Worx) + 0:03
3 - DYGERT Chloe (Canyon) + 0:05
4 - ADEGEEST Loes (FDJ) d. b.
5 - KOOL Charlotte (DSM) d. b.
6 - KERBAOL Cedrine (CERATIZIT) d. b.
7 - FAULKNER Kristen (EF) + 0:06
8 - VAN DIJK Ellen (Lidl) d. b.
9 - BREDEWOLD Mischa (SD Worx) + 0:09
10 - NORSGAARD Emma (Movistar) + 0:10
