Frantziako Tourra
15. etapa
Ion Izagirrek bigarren egin du, Nielsenek irabazitako etapan
Agentziak | Erredakzioa
Biak Bauke Mollemarekin batera iritsi dira Carcasonako helmugara, eta danimarkarra izan da azkarrena. Sailkapen nagusian ez dago aldaketarik.
Magnus Cort Nielsen danimarkarra gailendu da Frantziako Tourreko 15. etapa, 181,5 kilometrokoa, Millau eta Carcasona artean. Trantsiziozko jardunaldia izan da, atseden egunaren eta Pirinioetako etapen atarian. Sailkapen nagusian ez dago aldaketarik eta Geraint Thomasek lider jarraitzen du.
Astanako 25 urteko Nielsenek lau ordu 25 minutu eta 52 segundo behar izan ditu ibilbidea betetzeko. Bigarren Ion Izagirre gipuzkoarra izan da (Bahrain), eta hirugarren Bauke Mollema holandarra. Hirurak 29 txirrindularik osatutako eguneko ihesaldian izan dira.
Faboritoen taldea 13 minutuko atzerapenarekin iritsi da helmugara. Sailkapen nagusian Geraint Thomasek lehen postuan jarraitzen du, Chris Froome taldekide eta herrikidea bigarren da eta Tom Dumoulin holandarra hirugarren. Lehen euskal txirrindularia Mikel Landa arabarra da (Movistar), 3 minutu eta 42 segundora.
Astelehenean atseden eguna izango dute, bigarrena aurtengo edizioan.
