Froome, 'historia egiteko prest'

Chris Froome izango da Team Skyren taldeburua larunbatean hasiko den Frantziako Tourrean. Britainiarrak lau aldiz irabazi du Tourra, garaipenak lortu ditu Giroan eta Vueltan ere, eta bosgarren aldiz irabazi nahi du Tourra, lasterketa frantziarra bost aldiz irabazi duten Jacques Anquetil, Eddy Merckx, Bernard Hinault eta Miguel Indurain txirrindularien taldetxoan sartzeko.

"Azken 12 hilabeteak nire kirol-ibilbideko zailenak izan dira, baita harrigarrienak ere. Inoiz ez diot Tourrari heldu Giroan parte hartu ostean, eta horrek prestaketa aldatzea ekarri dit. Vueltan asko ikasi nuen Tourra egin ostean, eta beharrezko konfiantza eman dit lasterketa honetarako", adierazi du Skyko taldeburuak.

Froomek historia egin nahi du Frantziako Tourrean, eta laugarren lasterketa handia jarraian lortu nahi du: "Ez dut itxaropen ustelik egin nahi, baina prest nago eta ezin dut talde hobea izan niri laguntzeko. Urteko lasterketa garrantzitsuena da, eta hasteko irrikan nago".

Sir Dave Brailsford Sky taldeko zuzendariaren arabera, "Chris sasoiko dago Giroaren ostean. Prest dago eta talde guztia baliatuko da Giroan izan genuen arrakastaz". Tourrera daraman taldeari buruz, honakoa gaineratu du: "Gaztetasunaren eta esperientziaren arteko oreka duen taldea dugu. Gianni Moscon eta Egan Bernal talentu handiko txirrindulariak dira, eta asko dute taldeari eskaintzeko. Luke Rowek parte hartzea ere garrantzitsua da, izan zuen istripu larria gainditu ostean. Aste hauek oso garrantzitsuak dira guretzat, Frantzian korritzea gustatzen zaigu, eta hasteko irrikan gaude", esan du Skyko zuzendariak.