Txirrindularitza
5. etapa
Vivianirentzat izan da bosgarren etapako esprinta
AGENTZIAK | ERREDAKZIOA
Gaviria (Team Emirates) eta Kittel (Katusha) azpiratu ditu esprint estu batean.
-
Elia Viviani, garaile. Argazkia: ETBren bideo batetik ateratako irduia
Elia Viviani (Deceuninck Quick Step) txirrindulariak irabazi du Arabiar Emirerri Batuetako Itzuliko 5. etapa, Sharjah-Flag uhartean hasi eta Khor Fakkan hirian bukatu dena, 181 kilometroko ibilbidea bete ostean.
30 urteko italiarra Fernando Gaviria (Team Emirates) kolonbiarraren eta Marcel Kittel (Katusha) alemaniarraren aurretik sartu da helmugan, zentimetro gutxi batzuengatik erabaki den esprint luze baten ondoren.
Sailkapen nagusiari dagokionez, gauzak bere horretan geratu dira, hau da, Primoz Roglic (Jumbo) esloveniarrak lider darrai ostiralerako etapa erabakigarriaren esperoan. Bere atzetik daude Alejandro Valverde (Movistar) 21 segundora eta David Goudu (Groupama) frantziarra, 38ra.
Hartara, lasterketa irabazteko faborito nagusiak Jebel Jais mendatean amaituko den biharko etaparen zain daude. 180 kilometro korritu beharko dituzte txirrindulariek denetara, baina zailtasunak azken 23 kilometroetan helduko dira, goraka egingo baitute, 1.113 metroko altuerara iritsi arte.
