Italiako Giroa
2. etapa
Omar Fraile mendiko liderra da, Kittelen etapa garaipenaren egunean
Agentziak | Erredakzioa
Garaipen horri esker, alemaniarra hirugarren da orain sailkapen nagusian, Tom Dumoulin liderrarengandik segundo batera.
Marcel Kittel Etixx-Quick Step taldeko txirrindulariak irabazi du Italiako Giroko bigarren etapa. Alemaniarra Arnaud Demare (FDJ) frantziarrari eta Sacha Modolo (Lampre) italiarrari gailendu zaizkie esprintean.
Kittelek 4 ordu, 38 minutu eta 31 segundo behar izan ditu Arnhem eta Nimega arteko 190 kilometroak egiteko. Garaipen honi esker, alemaniarra hirugarren da orain sailkapen nagusian, Tom Dumoulin liderrarengandik minutu batera.
Kittelen hirugarren garaipena da Giroan, 2014ko edizioan lortutako bien ostean. Etixx-eko txirrindulariek ez die aurkariei aukerarik eman.
Bigarren etapak 190 kilometro izan ditu, eta Omar Fraile bizkaitarra izan da protagonista nagusietako bat. Fraile ihes eginda izan da 170 kilometrotan, Giacomo Berlato italiarrarekin eta Maarten Tjallinglii holandarrarekin batera.
Hirukoteak lehenengo kilometroan jo du erasoa eta 10 minutuko aldea ere izan du, baina abentura helmugarako 20 kilometroren faltan amaitu zaie.
Azken metroetan, Kittelek aurrea hartu du azken 200 metroetan, indartsu, eta ia hiru bizikletako distantzia atera die Demare eta Modolori.
