Euskal Herriko Itzulia
Apirilaren 4tik eta 9ra
Roglicek Itzulia sartu du Tourrerako bere bidean
AGENTZIAK | EITB MEDIA
Apirilaren 4a eta 9a bitartean, Itzulian egongo da berriro Primoz Roglic, eta iaz irabazitako titulua defendatuko du.
-
Roglic, 2021eko Itzuliko podiumean. Argazkia: EFE
Primoz Roglicek (Jumbo Visma) esloveniarrak baieztatu du Itzulia sartu duela Frantziako Tourrerako bere bidean. Bertan parte hartzeko azken erabakia, baina, denboraldia nola daraman aztertu ondoren hartuko du.
32 urteko txirrindulariak Tourra izango du helburu nagusi, eta 2021eko egutegiaren antzekoa egitea erabaki du, uztailaren 1ean Kopenhageko irteerara sasoi betean iristeko. Debuta, beraz, nahikoa berandu egingo du, martxoaren 6a eta 13a bitartean, Paris-Nizan.
Eguzkiaren lasterketaren ostean, Milan-San Remo korrituko du martxoaren 19an, Euskal Herriko Itzulia apirilaren 4tik 9ra, Flèche Vallone apirilaren 20an eta Liege-Bastogne apirilaren 24an.
Itzuliko iazko irabazleak oraindik ez du zehaztu Frantziako Tourrera joan aurretik beste zein probatan arituko den; beraz, Dauphiné Kriteriuma edo Suitzako Itzulia, esate baterako, oraindik ez dira ageri erlojupeko txapeldun olinpikoaren programan.
Vueltan parte hartuko duen ere ez dago argi oraindik (irabaztekotan, laugarren aldiz jarraian egingo luke), eta denboraldian ordura arte izandako emaitza eta sasoi puntuaren arabera hartuko du azken erabakia. Abuztuaren 19an Utrechten irteera hartuz gero, Roglicek Tadej Pogacar herrikidearekin bat egingo du, eta horrek maila handiko lehia ekarriko du.
