Kutxabank Araski aise gailendu zaio IDK Euskotreni (74-50)

Kutxabank Araski jaun eta jabe izan da IDK Euskotrenen aurka Mendizorrotzan jokatu duen derbian, eta jipoia eman dio Azu Muguruzaren taldeari: 74-50.

Bi taldeak garaipena lortzeko premiarekin iritsi dira gaurko partidara, Endesa Ligako sailkapeneko zulotik ateratzen hasteko, baina ez da lehiarik izan. Donostiako taldeak irudi kaskarra eman du, eta Made Urietaren neskak hasieratik bukaeraraino izan dira nagusi.

Neurketa bikain hasi du Araskik. Jokoa gobernatu du, eta nahieran aritu da, ohiko duen bizitasunarekin jokatuz. IDK, berriz, oso ahul egon da defentsan, eta ez du Gasteizko taldearen jokaldiak gelditzeko gaitasunik izan. Horren erakusgarri izan da lehen partzialeko emaitza: 21-11.  

Bigarren zatian, Azu Muguruzaren neskek ez dute hobera egin, eta bost minutuan 12-0eko partziala egin du Araskik. Partida kontrolpean zutela eta 23 puntuko abantailarekin joan dira atsedenaldira etxekoak (40-17), eta burumakur eta etsita bisitariak.   

Aldagelatik bueltan, gidoia ez da aldatu. IDK-k erasoan zertxobait hobetu du (18 puntu egin dituzte), baina defentsan makal jarraitu dute, eta Araskik 26 puntu gehiago egin ditu. Horrenbestez, Gasteizko taldeak errenta handitu egin du hirugarren partzialean (66-35).

IDK-k miraria behar zuen partidan sartzeko eta emaitza iraultzeko, baina ez da halakorik izan. Azken minutuetan, erritmoa jaitsi dute bi taldeek: batzuek, ordura arte egindako lanagatik, eta besteek, lur jota.

Azkenean, 74-50 gailendu da Kutxabank Araski, eta Ligako laugarren garaipena lortu du etxean, beheko postuetatik ihes egiteko. IDK Euskotrenek, berriz, gaizki hasi du urtea, eta zuzentzeko gauza asko ditu, zulotik atera nahi badu.

Bestalde, Endesa Ligako 15. jardunaldian, Lointek Gernika Bizkaiak 68-75 galdu du etxean Valentziaren aurka jokatu duen norgehiagoka, eta Construcciones Ardoik enegarren porrota jaso du Ferrolen (71-49). Horrenbestez, Iruñeko taldea azkena da sailkapenean.