Saskibaloia
Eurokopa
IDK Euskotrenek argi menderatu du Sepsi SIC Gascan (68-53), eta bostetik bost daramatza Eurokopan
EITB MEDIA
Azu Muguruzaren jokalariek merezita irabazi dute; izan ere, ez dute estutasunik izan erakusteko aurkariak baino kalitate handiagoa dutela. Hala, txapelketako fase erregularreko bost jardunaldi jokatuta, IDK Euskotrenek ezin hobeto jarraitzen du, eta soilik garaipenak izan ditu.
-
Delicia Washingtonek partida utzi behar izan du, lesioagatik. Argazkia: EITB Media.
IDK Euskotrenek Sepsi SIC hartu du mendean, 68-53, 2024-25 denboraldiko Eurokopako fase erregularreko bosgarren jardunaldian, C multzoan, Gascan, Donostian, asteazken gauean. Horrenbestez, Azu Muguruzaren taldeak ezin hobeto jarraitzen du txapelketan, orain arte jokatutako bost partidetan bost garaipen eskuratuta; seigarren eta azken jardunaldia gelditzen da, eta hori datorren asteazkenean izango da, Donostian hori ere, Proteas Voulas aurkari. Oraingoz, soilik garaipenak izan ditu IDK Euskotrenek Eurokopan. Euskal taldeak ziurtatu egin du multzoko lehenengo postua, eta, ondorioz, hurrengo txandan, play-offeko 1. txandan, etxean jokatuko du itzuliko partida.
Partidako lehen saskiratzea Sepsi SICek sartu du, baina IDK Euskotrenek hamar puntu jarraian sartuz erantzun du, eta argi gelditu da hasieratik bi taldeen arteko aldea. Lehenengo laurdena 20-13 amaitu da, eta bigarrenean Azu Muguruzaren jokalariek aurrerapausoa eman dute, eta Gascan bildutako zaleei gozatzeko aukera eman diete; errebotean nagusi, eta sendo defentsan, euskal taldea hamazazpi puntuz ari zen gailentzen, atsedenaldira joan denean. Nastja Claessensek bederatzi puntu sartu ditu aurreneko hogei minutuetan, IDK Euskotreneko beste inork baino gehiago.
Ciera Johnsonek eta Taya Robinsonek, trebe Sepsi SICen erasoan, erdietsi dute Errumaniako taldeak norgehiagokatik ihes ez egitea, hirugarren laurdenean; hori bukatuta, IDK Euskotren 54-41 ari zen irabazten. Azken laurdenean ezin izan du jokatu, lesioagatik, Delicia Washingtonek, baina IDK Euskotrenek ez du zailtasunik izan egindako lan ona biribiltzeko; emaitza, 68-53koa, esanguratsua da, eta erakusten du nola Donostiako taldeak merezita eskuratu duen garaipena.
Fitxa teknikoa
68 - IDK Euskotren: Buch (7), Alba Prieto (6), Becky (12), Claessens (15), Halvarsson (2) -hasierako bostekoa- Pendande (14), Lara Gonzalez (6), Delicia Washington (6), Mbulito, Becker (1)
53 - Sepsi SIC: Gereben (10), Popescu (2), Ghita, Taya Robinson (16), Ciera Jonhson (19), Meresz (6) -hasierako bostekoa- Nemes, Ghita, Belegante, Catinean, Mikes, Armanu.
Epaileak: Giacomo Dori, Irene Frosolini eta Pierre Gilis.
