Saskibaloia
EUROKOPA
IDK Euskotrenek Europako lidergoa ziurtatu nahi du
EITB MEDIA
Endesa Ligan ez dira fin ari donostiarrak, sailkapeneko azken postuetan baitaude; hala ere, IDK Euskotren liderra da Eurokopa multzoen fasean. Norgehiagoka zuzenean izango da ikusgai, ETB4n eta eitb.eus-en.
-
IDK Euskotren-Sepsi partida, azaroak 20, 20:00etatik aurrera. Irudia: EITB MEDIA
Asteazken honetan, azaroaren 20an, IDK Euskotrek Sepsi talde errumaniarraren aurka jokatuko du Gaskan, Eurokopan, multzoko lidergoa matematikoki ziurtatu eta hurrengo fasera pasatzeko asmoz. Partida zuzenean izango da ikusgai, ETB4n eta eitb.eus-en, 20:00etatik aurrera.
IDK Euskotrenek estu eta larri jarraitzen du Endesa Ligan, jaitsiera postuetan baitago, baina donostiarrek irudi bikaina ematen ari dira Europan. Ez dute aurkaririk izan; dena irabazi dute, eta orain, etxean, bi partida geratzen zaizkie hutsik egin gabe euren ibilbidea sinatzeko, lehenengoa Errumaniako Ligako bigarren sailkatuaren aurka, Sepsi.
Joaneko partida Azu Muguruzaren jokalarien erakustaldia izan zen (56-62), Transilvania eskualdean. Halvarsson suediarrak 11 puntu lortu zituen, baina euskaldunen jokoa da Eurokopan arrakasta izaten ari dena.
