Saskibaloia
La Roche Vendee aurkari
Lointek Gernikak Eurokopa txapelketako H multzoko lidergoa indartu nahi du
EITB Media
La Roche Vendee izango du aurkari asteazken honetan, multzoen faseko 2. jardunaldian. Partida zuzenean ikusi ahal izango da ETB4n eta eitb.eus-en, 20:00etatik aurrera.
-
Virtus Bolonia - Lointek Gernika partidako irudia. Argazkia: @GKesb
Lointek Gernika Bizkaiak Eurokopa txapelketako multzoen faseko bigarren jardunaldiko partida jokatuko du La Roche Vendee taldearen aurka, asteazken honetan (20:00) Gernika-Lumoko Maloste kiroldegian.
Bizkaiko taldeak garaipena lortu zuen Virtus Boloniaren aurka (60-65) lehen jardunaldian, eta multzoko lidergoa indartu nahi du. La Roche Vendeek ere irabazi egin zuen Flammes Carolo Basketen kontra (68-64), talde frantziarren arteko lehian.
Hartara, lehen jardunaldian garaipena lortu zuten taldeen arteko partida izango da ikusgai asteazkenean. Gainera, bi taldeek porrota jaso zuten euren ligetan; Lointek Gernikak Valentziaren aurka (77-60) eta La Roche Vendeek Tarberen kontra (83-78).
Norgehiagoka zuzenean ikusi ahal izango da ETB4n eta eitb.eus-en, 20:00etatik aurrera.
