Baskonia
Bajak eta balizko berritzea
Kotsarrek, Chiozzak eta Theodorek ez dute Baskonian jarraituko; Costellori berritzea eskaini diote
EITB MEDIA
Kotsarrek bi denboraldi eman ditu Gasteizko klubean, eta Chiozza eta Theodore duela hilabete batzuk iritsi ziren, 2023-24 denboraldian. Costello tanteo eskubidearen zerrendan dauden jokalarietako bat da; horrek esan nahi du Baskoniak berritze eskaintza egin diola.
-
Maik Kotsar, Alba Berlinen aurkako partidan, azken Euroligan. Argazkia: EFE.
Maik Kotsar pibotak eta Chris Chiozza eta Jordan Theodore joko antolatzaileek ez dute Baskonian jarraituko, asteartean Gasteizko klubak ohar bidez iragarri duenez. Bitartean, Matt Costello pibota tanteo eskubidearen gaineko ACBk argitaratutako zerrendan agertzen da, eta horrek esan nahi du Baskoniak berritze eskaintza egin diola.
Testuinguru horretan, Kotsar 2022ko udaran iritsi zen Gasteizko klubera, Alemaniako Hamburg Towers taldetik. Lehen denboraldian, oso ondo aritu zen: Euroligan, batez beste, 11,3 puntu sartu eta 5,2 errebote hartu zituen, partidako. Bigarren denboraldian, Fenerbahceren aurkako neurketan nabarmendu zen bereziki, 15 puntu sartu eta 10 errebote harrapatu baitzituen; norgehiagoka horretan, 24 erdietsi zuen, balorazioan.
Chiozza eta Theodore 2023-24 denboraldian heldu ziren Gasteizera, Baskoniak arazoak zituelako antolatzailearen postuan. Chiozzak, Euroligan, batez beste 1,9 puntu sartu eta 2,5 asistentzia eman ditu, neurketako, eta 3,6 puntu eta 2,6 asistentzia Endesa Ligan; Theodorek, batez beste, 3,5 puntu sartu eta 1,1 asistentzia eman ditu.
Costellori dagokionez, azken hiru denboraldietan Baskonian emanda, kontratua orain amaituko zaio, baina Baskoniak aukera du jokalariak taldean jarraitzeko; horretarako, Endesa Ligako beste edozein taldek pibotari egindako eskaintza berdindu beharko du. Halaber, euskal klubak negoziazioa egin lezake talde horiekin, horiek tanteo eskubidea ez gauzatzeko.
Horrez gain, Endesa Ligan dagoeneko ez dauden hainbat jokalariren gaineko tanteo eskubidea bermatu egin du Baskoniak; hala, Endesa Ligara bueltatzea erabakiz gero, Baskoniak lehentasuna izango luke, Gasteizko taldeko jokalariak izan daitezen. Hauek dira: Vanja Marinkovic, Darius Thompson eta Sidy Cissoko.
Orain, epe bat zabaltzen da, 13 egunekoa. Epe horretan, tanteo eskubidearen zerrendan dauden jokalariek aukera dute aurkezteko jasotzen dituzten eskaintzetako dokumentuak aurkezteko, beraiek sinatuta; orain arte izan diren klubek bost egin izango dituzte eskaintza horiek berdintzeko.
