Caja Laboral-Lucentum (65-55): Txus Vidorretaren taldea gainditu dute

Garaipen garrantzitsua eskuratu du Baskoniak Alacanten aurka (65-55). Dusko Ivanovicen taldeak arazoak izan ditu partida erabakita uzteko Lucentumek azken minutura arte borrokatu baitu neurketa. Hala ere, azkenengo laurdenean 10-0ekoa partzial erabakigarria lortu du Caja Laboralek garaipena eskuratzeko.

Lucentumek ondo hasi du norgehiagoka eta Singlerrek eta Ivanovek markagailuan goitik jarri dute Alacanteko taldea (2-8). Hala ere, Olesonek ederki gidatu du Baskoniaren erasoa eta Teletovicek 13-10ekoa jarri du markagailuan. Txus Vidorretaren mutilek ondo eutsi dute defentsan, baina Fernando San Emeteriok 20-18ko jarri du saskiraketa eder bati esker.

Bigarren laurdenean Alacanteko taldea berriro goitik jarri da markagailuan Llomparten lanari esker, baina Kevin Seraphin kantxaratu da eta frantziarrak ederki agindu du taula azpian. Thomas Heurtelek 30-27koa jarri du hiruko bati esker atsedenaldia baino lehen.

Atsedenaldia eta gero bi taldeek hutsegite argiak egin dituzte erasoan, baina Ivanovicen mutilek nagusitasuna mantentzea lortu dute San Emeterioren lan bikainari esker (41-33). Kyle Singlerrek puntu garrantzitsuak lortu ditu Lucentumentzat eta Vidorretaren mutilek 48-41ekoa jarri dute markagailuan.

Dewarren saskiraketa batek 53-53koa jarri du markagailuan partida bukatzeko lau minutura eta Arabako taldean zalantza azaldu da. Hala ere Teletovicek ederki gidatu du taldea erasoan eta Baskoniak 10-0ekoa partzial erabakigarria eskuratu du. Azken markagailua 65-55ekoa izan da eta Caja Laboralek denboraldiko bosgarren garaipena eskuratu du Iradier Arenan.

- Fitxa teknikoa:

65 - Caja Laboral (20+10+18+17): Heurtel (3), Oleson (11), N. Bjelica, Teletovic (22), Dorsey (2) -hasierako bostekoa-, Seraphin (7), Ribas (3), M. Bjelica, Williams, San Emeterio (11), Prigioni (6).

55 - Lucentum Alacant (18+9+14+14): Llompart (3), Dewar (8), Singler (15), Ivanov (12), Barnes (4) -hasierako bostekoa-, Ellis (3), Kone (6), Stojic (2), Urtasun, Freire (2)