Baskonia
71-96, Broseren aurka
Baskoniak erakustaldia eman du eta Euroligako playoffak oso gertu ditu
Erredakzioa
Arabako taldeak 71-96 irabazi dio Brose Bambergi eta Euroligako final-laurdenetara sailkatzeko aurrerapusoa eman du. Asteazkenean Darussafakak CSKAren aurka galtzen badu Baskonia sailkatuta egongo da.
Baskoniak 71-96 irabazi dio Brose Bambergi eta oso gertu du Euroligako playoffetara sailkatzea. Zalgirisek 68-76 galdu du Efesen aurka eta Panathinaikosek 74-61 irabazi dio Emporio Armani taldeari. Ondorioz, astezakenean Darussafaka taldeak CSKAren aurka galtzen badu, Arabako taldea matematikoki sailkatuta egongo da final-laurdenetako kanporaketetarako.
Bikain ekin dio Baskoniak partidari eta Broseri ez dio aukerarik eman lehen hamar minutuetan. Sito Alonsok zuzentzen duen taldeak 17 puntuko abantaila eskuratu du (11-28) lehen laurdenaren amaieran. Bigarren laurdenean ez da norgehiagokaren gidoia aldatu. Arabako taldeak ez dio lehia estutzen utzi Broseri eta aldeko 37-53ko emaitzarekin iritsi da Baskonia atsedenaldira.
Hamasei puntuko abantailarekin ekin dio talde gasteiztarrak hirugarren laurdenari. Baskonia ez da erlaxatu eta lehen 20 minutuetan lortutako abantaila handitu du (53-74). Azken laurdenerako erabakita egon da partida eta amaierako emaitza Baskoniaren aldeko 71-96koa izan da.
Fitxa teknikoa:
71 - Brose Bamberg (11+26+16+18): Zisis (4), Causeur (-), Miller (5), Melli (4) eta Radosevic (5) -hasierako bostekoa-, Veremeenko (1), Nikolic (4), Heckmann (6), McNeal (17), Theis (11), Olinde (2) eta Staiger (12).
96 - Baskonia (28+25+21+22): Larkin (17), Hanga (4), Budinger (17), Shengelia (16) eta Voigtmann (7) -hasierako bostekoa-, Sedekerskis (-), Tillie (8), Blazic (5), Beaubois (9), Diop (4), Laprovittola (-) eta Luz (7).
Epaileak: Belosevic (Serbia), Hordov (Kroazia) eta Latisevs (Letonia).
