Estudiantes-Lagun Aro (62-58): Garaipena lortu gabe jarraitzen du GBCk

Lagun Aro GBCk garaipenik lortu gabe jarraitzen du Endesa Liga larunbat honetan Asefa Estudiantesen aurka beste porrot bat jaso ondoren (62-58). Gipuzkoarrek 21 puntuko aldea izan zuten hirugarren laurdenean, baina ez da nahikoa izan Estudiantesi irabazteko.

Partida bikain hasi zuten gipuzkoarrek eta hasiera horri esker abantaila hartzen hasi zen Lagun Aro. Etxeko taldea ez zen gai izan talde donostiarraren defentsa zulatzeko eta saski aurrean ez ziren fin ibili. Horrenbestez, Lagun Aro 10 puntuko aldearekin iritsi zen lehen hamar minutuen bukerara (9-19).

Bigarren laurdenari ondo ekin ziona Estudiantes izan zen. Madrilekoak lau punturaino hurbildu ziren (18-22), baina orduan esnatu zen Gipuzkoa Basket eta berriro alde garrantzitsuak lortzen hasi zen talde gipuzkoarra. Norgehiagoka 20-36ko emaitzarekin iritsi zen atsedenaldira.

Atsedenalditik bueltan Lagun Arok ondo jokatu zituen hirugarren laurdenaren hasierako lehen minutuak eta 21 punturainoko abantaila izatera iritsi ziren (25-46). Orduan, Estudianteseko zaleak txistuka hasi beharrean taldea animatzen hasi ziren eta Pepu Hernandezen mutilak gora etorri ziren. Madrileko taldea aldeak murrizten hasi zen eta zortzi puntuko desabantailarekin ‘soilik’ galtzen zebiltzan etxekoak hirugarren laurdenaren bukaeran (41-49).

Azken laurdena partidako berdinduena izan zen eta aldi berean laurdenik txarrena Lagun Aro GBC taldearentzat. Estudiantes norgehiagokan lehen aldiz markagailuan aurreratu zen bukaerarako sei minutu falta zirenean (51-50). Azken minutuetan urduri jarri ziren gipuzkoarrak eta Estudiantesek hobeto jokatu zituen une erabakiorrak. Hori dela eta Pepu Hernandezek zuzentzen duen taldeak garaipena lortu zuen 62-58ko emaitzarekin.

Fitxa teknikoa:

62. Asefa Estudiantes (8+12+21+21):Granger (6), Wright (14), Carlos Jimenez (4), Clark (0) eta Simmons (8)-hasierako bostekoa- Gabriel (13), Flores (15), Jaime Fernandez (2) eta EduMartinez (0)