Lucentum-Bilbao Basket (81-77): Bizkaitarren porrota

Bilbao Basketek ezin izan du denboraldiko aurreneko garaipena eskuratu Lucentumen aurka 81-77 galdu baitu etxetik kanpora. Bizkaitarrek partidako azken segundoetan galdu dute norgehiagoka talde beltzak akats larriak egin baititu erasoan. Atsedenaldiaren ostean Katsikarisen mutilak nagusi izan dira, baina Alacanteko taldeak azken unean markagailua irauli du ezustekoa emateko.

Txus Vidorretak zuzendutako taldeak hasiera bikaina egin du euren zaleen aurrean onena eman nahian eta Alacanteko taldeak 8-0ekoa lortu du. Katsikarisen mutilek defentsan nahiko sufritu dute, baina Fischerrek Bilboko taldea partidan sartu du saskiraketa garrantzitsuak lortuta. Aaron Jacksonek partida berdintzea lortu du (12-12) eta Josh Fisherren hiruko bati esker Bilbao Basket 17-18 markagailuan aurretik jarri da. Hala ere Lucentumek 23-18koa jarri du bigarren laurdena 5 puntuko aldearekin hasteko.

Alacanteko taldeak erritmoa bizitu egin du bigarren laurdenean eta 8 puntuko aldea lortu du (29-21). Mumbruk eta Aaron Jacksonek aldea murritzu egin dute, baina Vidorretaren mutilak aurretik mantendu dira. Singlerrek eta Hazellek ondo zuzendu dute etxeko taldearen erasoa eta atsedenaldira 43-39 aurretik joan da Lucentum.

Hirugarren laurdenean Fotis Katsikarisen mutilek gehiago sakatu dute erasoan eta Fischerrek lan bikaina egin du taula azpian. Stevicek markagailuan aurretik jarri ditu bizkaitarrak (48-49) eta Alacanteko taldeak indarra galdu du erasoan. Bilbao Basketeko jokalariek euren kalitatea kantxara atera dute eta hirugarren laurdena 56-62koarekin bukatu da.

Azkenengo laurdenean Bilboko taldeak lortutako aldea mantendu du eta Janis Blumsek eta Banicek saskiraketak lortu dituzte (61-70). Hala Ere, Singlerrek 4 puntura jarri du Lucentum markagailuan (70-74) eta etxeko taldeak aukera ondo aprobetxatu du azken minutuan emaitza iraultzeko (77-76). Partidako azkenengo segundoetan Bilbao Basketek akats larriak egin ditu eta Vidorretaren mutilek eskuratu dute garaipena (81-77).

- Fitxa teknikoa:

81 - Lucentum Alacant (23+20+13+25): Llompart (4), Dewar (11), Singler (23), Ivanov (8), Barnes (12) -hasierako bostekoa-, Rafa Luz (10), Alex Urtasun, Stojic, Hazell (8) eta Kone (5).

77 - Bizkaia Bilbao Basket (18+21+23+15): Jackson (15), Janis Blums (5), Mumbru (10), Fisher (11), Banic (10) -hasierako bostekoa- Josh Fisher (5), Mavroeidis (2), Stevic (6), Raul Lopez, Vasileiadis (13) eta Grimau (-).