Bilbao Basketek ACBn sartzeko eskaera egin du, Ogasunarekin akordioa egin ostean

Bilbao Basketek ofizialki eskatu du ACBn sartzea, datorren denboraldian Endesa Ligan jokatu ahal izateko. Eskaera ACBk uztailaren 16an egingo duen batzarraren oniritziaren zain geratu da.

Klubak komunikatu batean azaldu duenez, eskaeran "Ogasunarekin eta Segurantza Sozialarekin dituen betebeharrak egunean daudela frogatzen duten ziurtagiriak" sartu dituzte, "erakundeekin egindako akordioei esker". Klubak Ogasunarekin duen 3,4 milioiko zorraren ordainketak noiz eta nola egin adostea lortu du.

Duela aste batzuk, hartzekodunek oniritzia eman zioten Bilbao Basketek zorra ordaintzeko egindako proposamenari eta, beraz, hartzekodunen konkurtsoa ixteko bidea zabalik utzi du.

Akordio horren arabera, hartzekodunen % 65ek zorraren % 80 kitatzea eta konkurtsoa ixtea onartu du eta, horri esker, klubak aurrera egin ahal izan du ACBn sartzeko eskaerarekin, ekainaren 2an maila igoera lortu ostean.

Bilbao Basketek eskerrak eman nahi izan dizkie "zaleei, hornitzaileei, jokalariei, langileei eta administrazio publikoei" proiektuan agertutako "konfiantzagatik".