Pilepic: 'Faboritoak gara'

Uxue Bilbao Basketek Budivelnik taldearen aurka jokatuko du Eurokopako finalerdietan, eta Fran Pilepic Uxueko jokalariak aurkariaren arriskuaz ohartarazi du: "Talde ezezaguna da, baina Eurokopako finalerdietarako txartela lortu du, eta, beraz, arriskutsua da", esan du.

Asteazkenean joaneko neurketa jokatuko dute, Kieven, eta Pilepic baikor agertu da: "Gure helburua garaipena izan behar da, baina Alemanian gertatu zena errepikatzen bada, aldea ahalik eta txikiena izaten saiatu beharko gara. Itzulikoa Miribillan jokatuko dugu, eta atzean zein aurrean ondo jokatzen badugu, eta zaleen babesa kontutan izanda, edozein talde mendean hartzeko gai gara. Faboritoak garela uste dut", gaineratu du.