Pilota
DEBUTA
Ander Muruak Asperekin debutatuko du irailaren 8an
A. A. | EITB MEDIA
Arrasateko aurrelaria Tolosarekin batera arituko da, Egiguren V.aren eta Bikuñaren aurka, Caixabank Masterseko zazpigarren jardunaldiko partida hartuko duen jaialdiaren barruan.
-
Ander Murua Asperen elastikoarekin. Argazkia: Aspe
Ander Murua Txintxurreta pilotariak irailaren 8an debutatuko du profesionaletan Asperen elastikoarekin bere jaioterrian, Arrasaten.
Uarkape pilotalekuan 17:00etatik aurrera jokatuko den jaialdiak Caixabank Masterseko zazpigarren jardunaldiko partida bat hartuko du, eta aurrelari gipuzkoarrak aipatu jaialdiko hastapeneko lehian parte hartuko du, Tolosarekin bikotea osatuta eta Egiguren V.aren eta Bikuñaren aurka aritzeko. Ondoren, P. Etxeberria-Mariezkurrena II eta Zabala-Imaz bikoteen arteko norgehiagoka nagusia izango da ikusgai.
Muruak (23 urte) hainbat txapel irabazi ditu aurten, besteak beste, Goñi Memoriala, Bergara Hiria txapelketa, Euskal Herriko txapelketa eta Errege Kopa.
Anderren arabera, Inaxio Errandoneak deitu zionean, "ezusteko handia" jaso zuen. "Debutatzea pilotari guztion ametsa da, eta orain aukera aprobetxatzea eta gozatzea dagokit", gaineratu du Asperen webgunean zabaldutako adierazpenetan.
