Alberdi II.ak hautsita dauka lotailu gurutzatua

Baiko enpresak ostegun honetan jakitera eman duenez, Unai Alberdi aurrelariak hautsita dauka eskuin belauneko aurreko lotailu gurutzatua.

Azpeitiko pilotari gazteak, profesionaletan urtarrilaren amaieran debuta egin zuenak, uztailaren 11n hartu zuen min, sanferminetako pilota jaialdi batean parte hartzen ari zela, Imazekin batera bikotea osatuz, Victor eta Tolosaren aurka.

Neurketa bukatzeko gai izan bazen ere (Victorrek eta Tolosak irabazi zuten neurketa, 18-12), gerora egin zaizkion probek lesioa duela plazaratu dute.

Baikoren oharrean jasotzen denaren arabera, Alberdi II.ak "tratamendu kirurgikoa behar du eta ebakuntza aurreko errehabilitazio-fasea hasiko du".