Lau t'erdikoa
Ostiralean hasiko da
Hamabi pilotari arituko dira ostiraletik 2023ko Lau t’erdikoan, Ezkurdiaren hurrengoa izateko
EITB MEDIA
Joseba Ezkurdia (egungo txapelduna), Jokin Altuna, Aitor Elordi, Peio Etxeberria, Iker Salaberria eta Danel Elezkano izango ditu Aspek txapelketan; Erik Jaka, Mikel Urrutikoetxea, Iñaki Artola, Jon Ander Peña, Iker Larrazabal eta Asier Agirre izango dira Baikoko ordezkariak.
Hamabi pilotari, Aspeko sei eta Baikoko beste sei, lehiatuko dira ostiraletik, urriaren 6tik, 2023ko Lau t'erdiko Eusko Label Txapelketan, 2022an Joseba Ezkurdiak lortutakoa errepikatu nahirik. Asteartean aurkeztu duten Lau t'erdikoan, Arbizuko aurrelariaz gain, Jokin Altuna, Aitor Elordi, Peio Etxeberria, Iker Salaberria eta Danel Elezkano jarriko ditu jokoan Aspek; Baikok, bere aldetik, Erik Jaka, Mikel Urrutikoetxea, Iñaki Artola, Jon Ander Peña, Iker Larrazabal eta Asier Agirre izango ditu ordezkari. Finala azaroaren 19an jokatuko dute, Bilbon, Bizkaia Fontoian.
Hain zuzen ere, Danel Elezkanok eta Asier Agirrek erdietsi dituzte txapelketarako azken bi txartelak; biek ala biek asteburuan lortu dute hori, jokatu dituzten atarikoak irabazita. Elezkano II.ak Dario menderatu du, 22-15, eta Agirrek, ordea, Iraitz Zubizarreta kanporatu du, 22-16 gailenduta.
Hala, Elezkano eta Agirre ere sartu dira hamabi pilotari horien artean, eta historiako berrogeigarren Lau t'erdikoan parte hartuko dute. Txapelketa ostiralean hasiko da; egun horretan, final-zortzirenetako aurreneko kanporaketa jokatuko dute, Agoitzen, Artolak eta Agirrek. Final-zortzirenetan, guztira, lau kanporaketa jokatuko dituzte, eta lau pilotarik lortuko dute tokia final-laurdenetako ligaxkarako; bertan, beste lau pilotarekin batera arituko dira, bermatuta baitute ligaxkarako txartela.
FINAL-ZORTZIRENETAKO KANPORAKETAK
Artola-Agirre (Agoitzen, urriaren 6an, ostiralez, 21:15ean)
Jaka-Larrazabal (Laudion, urriaren 7an, larunbatez, 17:15ean)
Urrutikoetxea-Salaberria (Tolosan, urriaren 8an, igandez, 17:00etan)
Elezkano II.a-Peña II.a (Tolosan, urriaren 8an, igandez, jaialdia 17:00etan hastekoa da)
Final-laurdenetan, ligaxkan, parte-hartzaileak bi multzotan banatu dituzte, A eta B, eta multzo bakoitzeko bi pilotari sailkatuko dira finalaurrekoetara, multzo bakoitzeko aurreneko biek.
FINAL-LAURDENETAKO LIGAXKAREN MULTZOAK
A MULTZOA
Ezkurdia
Peio Etxeberria
Urrutikoetxea/Salaberria
Jaka/Larrazabal
B MULTZOA
Altuna III.a
Elordi
Artola/Agirre
Elezkano II.a/Peña II.a
Finalerdietan, A multzoko lehenengoa B multzoko bigarrenarekin arituko da nor baino nor gehiago, eta A multzoko bigarrenak, aldiz, B multzoko aurrenekoaren kontra jokatuko du. Neurketak azaroaren 4an eta 5ean izango dira.
Finalaurrekoetako galtzaileek hirugarren posturako partidan jokatuko dute, azaroaren 12an, eta bi garaileek 2023ko Lau t'erdiko txapelketaren final handia jokatuko dute, azaroaren 19an, Bizkaia Frontoian, Bilbon.
