Buruz Burukoa
Ezkurdiari irbazita (12-22)
Jokin Altuna, Buruz Buruko Txapelketako lehen finalista
A. B. E. | EITB Media
Amezketako pilotariak irabazi egin dio Joseba Ezkurdiari 12-22ko emaitzarekin finalerdietako partida, eta finala jokatuko du Darioren eta Elordiren arteko neurketako garailearen kontra.
![Jokin Altuna Jokin Altuna](http://media.eitb.eus/multimedia/images/2023/05/20/3106008/20230520205819_altuna-buruz-burukoa_foto610x342.jpg)
![](http://images14.eitb.eus/multimedia/recursos/generales/play_gris_grupohome.png)
Jokin Altunak Buruz Buruko Txapelketako finalerako txartela eskuratu du larunbat honetan, maiatzaren 20an, finalerdietan Joseba Ezkurdia mendean hartuta 12-22ko emaitzarekin Iruñeko Labrit frontoian.
Bikain ekin dio lehiari Altuna III.ak, lau tanto jarraian eginda (0-4). Ondoren, Ezkurdiak aurkariaren bolada ona moztea lortu du, desabantaila bi tantora murriztuta (2-4).
Ezkurdiak segidan bereganatutako bi tantoen ostean, berriro nagusi izan da Jokin Altuna, eta Amezketakoak (Gipuzkoa) zortzi tantoko errenta eskuratu du (2-10). Partida oso maldan gora jarri zaio Joseba Ezkurdiari, baina Arbizukoak (Nafarroa) ez du etsi, eta aldeak txikitu ditu sakea berreskuratuta (5-10).
Momentu txar bat pasa du Altunak, eta bazirudien emaitza estutu egingo zela, baina gipuzkoarrak bere joko-maila berreskuratu eta agintzen hasi da beste behin (5-12).
Ordutik aurrera, jaun eta jabe izan da Altuna III.a; zuloa ireki du markagailuan amezketarrak (6-14), Ezkurdia ez da emaitza estutzeko gai izan eta garaipena bideratuta utzi du Gipuzkoakoak (7-17).
Azken txanpan, arriskatu egin du Joseba Ezkurdiak desabantaila murrizteko asmoz; hala ere, Altuna III.a ez da erlaxatu, maila onean jokatzen jarraitu du eta garaipenak ez dio ihes egin (12-22).