Buruz Burukoa
Final-zortzirenak
Retegi Bi final-laurdenetan da, Ezkurdiaren aurka sufrituta (22-18)
Erredakzioa
Eratsungoak indartsu hasi zuen partida eta alde handia lortu zuen markagailuan, baina Ezkurdiaren susperraldiak neurketa 17na jarri zuen eta Arbizukoa emaitza iraultzear izan zen.
Julen Retegik Buruz Burukoaren final laurdenetarako txartela lortu du Joseba Ezkurdiari 22 eta 18 irabazita, bi zati oso ezberdin izan dituen partidan.
Ezkurdiari kosta egin zitzaion neurketan sartzea, motel ibili zen eta huts gehiegi egin zituen. Eta erruz ordaindu zuen hori. Retegi Bi, aldiz, sendo aritu zen, lekua ondo hartuta, eta berehala zabaldu zuen aldea markagailuan (17-4).
Baina eratsundarrak garaipena poltsikoan zuela zirudienean, Ezkurdia suspertu egin zen eta partida 17na jarri zuen. Baina hurrengo tantoa, erabakigarria, Retegi Biren alde jausi zen, eta berak eraman zuen azkenean garaipena.
Final-laurdenetan Aimar Olaizola egungo txapelduna izango du aurkari.
