Binakakoa
Bosgarren jardunaldia
Berasaluzek eta Albisuk lehen puntua lortu dute Mungian
Erredakzioa
Berasaluzek eta Albisuk Gonzalez-Zubieta bikotearen partida eskasa aprobetxatu dute lehen garaipena lortzeko (22-16). Azkaineko aurrelariak arazo fisikoak izan ditu neurketa osoan zehar.
Pablo Berasaluzek eta Jon Ander Albisuk Binakako Txapelketan aurreneko garaipena lortu dute gaur. Berasaluze-Albisu bikoteak Sebastian Gonzalez eta Aitor Zubieta hartu ditu mendean (22-16), Mungiako pilotalekuan. Horrela, Bizkaiko aurrelariak eta Gipuzkoako atzelariak txapelketako lehen puntua bildu eta bizirik jarraitzen dute.
Bi bikoteek ez dute partida onik jokatu; izan ere, galdutako pilotak egindako tantoak baino gehiago izan dira. Gainera, Gonzalez ondoezik egon da norgehiagoka osoan zehar eta asko sufritu du. Azkaineko aurrelariak atsedenaldiak eskatu behar izan ditu indarberritzeko.
Atzelariek pilota asko galdu dituzte, baina era berean, neurketari eutsi diote Albisuk eta Zubietak. Hala eta guztiz ere, partida oso parekatua joan da, eta amaieran erabaki da, Berasaluze eta Albisu indartsuago heldu baitira, eta neurketako jokorik onena une horretan egin dutelako.
Partida tantoz tanto: 0-1; 1-1; 2-1; 3-1; 4-1; 4-2; 5-2; 6-2; 7-2; 7-3; 7-4; 8-4; 9-4; 9-5; 9-6; 10-6; 10-7; 10-8; 11-8; 12-8; 13-8; 13-9; 13-10; 14-10; 14-11; 14-12; 14-13; 14-14; 14-15; 15-15; 16-15; 17-15; 18-15; 19-15; 19-16; 20-16; 21-16; 22-16.
