Virginia Diaz arraunlaria final-laurdenetara sailkatu da

ARRAUNA

Virginia Diaz arraunlariak final-laurdenetarako txartela lortu du Parisko Jokoetan, Vaires-sur-Marne estadio nautikoan jokatutako lehian.

Basque Teameko kirolariak ondo kontrolatu du bere seriea, erlojuaren aurka bigarren denborarik onena eginda, 07:37.30. Tara Rigney australiarrak soilik hobetu du Diazen denbora (07:30.71). Emaitza horrek final-laurdenetarako pase zuzena eman dio Diazi, berraukerari itxaron gabe.

Virginia Diaz

BELAR HOCKEYA

Espainiako selekzioak 4-0 galdu du bere estreinakoan Britainia Handiaren aurka. Max Caldasen taldeak arrisku handiagoa sortu du hasierako minutuetan, baina penalti-kornerretan izandako aukerak ez ditu aprobetxatu eta horrek gauzak erraztu dizkie britainiarrei. Bi gol egin dituzte hiru minututan, atsedenaldira iritsi aurretik.

Bigarren zatian, britainiarrek neurketa erabaki dute penalti batekin eta amaierarako 2 minuturen faltan egindako golarekin. 'Chefo' Basterra eta Rafa Villalonga getxoztarrek hasieratik jokatu dute.

Espainia-Britainia Handia

ESKUBALOIA

Espainiako gizonezkoen eskubaloi selekzioak 25-22 garaitu du Eslovenia Parisko 2024ko Olinpiar Jokoetako A multzoko lehen partidan, lehen zati grisa egin eta bigarren 30 minutuetan erreakzio bikaina izan ondoren. Garciandia jokalari urretxuarra, bestalde, hasierako zazpikoan aritu da.

Garaipenak bidea erraztu die Jordi Riberaren jokalariei lehen fase honetan, baina gaizki hasi dira eta zortzi tanto baino ez dituzte egin lehen zatian. Atsedenaldiaren ostean, Espainiako taldeak bere irudia hobetu du eta lehen garaipena lortu du Parisko 2024ko Olinpiar Jokoetan, golak funtsezkoak izango diren txapelketa batean.

Imanol Garciandia

SASKIBALOIA

Dario Brizuela donostiarraren eta Xabier Lopez-Arostegui getxoztarraren Espainiako saskibaloi selekzioak ezin izan du garaipenarekin hasi Parisko Joko Olinpikoetako ibilbidea, larunbat honetan, Lillen, 92-80 galdu baitu Australiaren aurka.

Santi Aldama partidako saskiratzaile nagusiaren 27 puntuak ez dira nahikoa izan Espainiaren porrota saihesteko, eta Rudy Fernandez kapitainak mugarri bat ezarri du, sei olinpiar jokotan lehiatu den historiako lehen jokalaria izan baita.

Australia-Espainia