Real Madril-Olympique Lyon (4-0): Garaipen handia Santiago Bernabeun

Astearte honetan jokatu dira Txapeldunen Ligako hirugarren jardunaldiko partida batzuk. A, B, C eta D multzoetako taldeak aritu dira lehian eta ikuskizuna aberatsa izan da.

Real Madrilek Olympique Lyonen aurka lortutako garaipena izan da azpimarragarriena. Mourinhok zuzentzen duen taldeak 4-0 irabazi du eta multzoko liderra da 9 punturekin. Ajaxek 0-2 irabazi dio oraindik punturik lortu ez duen Dynamo Zagrebi eta bigarren dira holandarrak lau punturekin. Lyon ere lau punturekin dago, baina hirugarren postuan.

A multzoan Bayern Munich da liderra zazpi punturekin nahiz eta Napoliren aurka 1-1 berdindu duen. Italiarrak dira bigarren sailkapenean 5 punturekin. Beraien atzetik Manchester City dator 4 punturekin. Ingelesek Vila-reali irabazi diote 2-1 azken minutuan Aguerok sartutako golari esker. Vila-realek ez du punturik lortu oraindik eta ia kanporatuta dago.

Benfica da C multzoko lider berria gaur arte lehen postuan zegoen Basileari (4 puntu) 0-2 irabazita. Portugaldarrek zazpi puntu dituzte. Bigarren postuan Manchester United dago 5 punturekin. Fergusonen mutilek sufritu egin dute Otelul Galatiri irabazteko. Errumaniarrek ez dute punturik lortu oraindik, baina Unitedek penaltiz egin behar izan ditu bi golak.

B multzoan CSKA Moskvak 3-0 irabazi dio Trabzonsporri eta multzoko liderrak dira 7 punturekin. Bigarren postua Internazionalerentzat da italiarrek 0-1 irabazi baitiote Lilleri. Rannieriren taldeak 6 puntu ditu. Hirugarren postua Trabzonsporrentzat da 4 punturekin eta azken postuan Lille dago bi punturekin.

Astearte honetako partidetako emaitzak (A, B, C eta D multzoak):

18:00 PFC CSKA Moskva 3- Trabzonspor AS 0
20:45 LOSC Lille Métropole 0- FC Internazionale 1
20:45 SSC Napoli 1- FC Bayern München 1
20:45 Manchester City FC 2- Villarreal CF 1
20:45 FC Basel 1893 0- SL Benfica 2
20:45 FC Otelul Galati 0- Manchester United FC 2
20:45 Real Madrid CF 4- Olympique Lyonnais 0
20:45 NK Dinamo Zagreb 0- AFC Ajax 2