Txapeldunen Liga
2. JARDUNALDIA
Bayernek txikitu egin du Tottenham (2-7) eta Real Madrilek irabazi gabe darraio (2-2)
AGENTZIAK | ERREDAKZIOA
Alemaniako taldea galtzen hasi bada ere, berehala berdindu du markagailua, eta Gnabryren (4) eta Lewandowskyren (2) golekin ezinean utzi du txapeldunordea.
-
Bayerneko jokalariak gol bat ospatzen. Argazkia: EFE
Txapeldunen Ligako A, B, C eta D multzoetan 2. jardunaldiari dagozkion neurketak jokatu dira astearte honetan, eta markagailu bat nabarmendu da beste guztien gainetik. Izan ere, Bayern Munichek izugarrizko gol erakustaldia eman du Londresen, Tottemhami 2 eta 7 irabazita. Serge Gnabry izan da neurketako izarra, bere taldearen zazpi goletatik lau erdietsi baititu. Gainerakoak Lewandowskyk (2) eta Kimmichek sartu dituzte.
B multzoko beste neurketan, Izar Gorria Olympiakosi gailendu zaio (3-1), eta, hartara, Londresko taldea, hau da, joan zen urteko txapeldunordea, hirugarren dago sailkatuta bere multzoan, puntu bakarrarekin.
Bere aldetik, Real Madrilek berdindu besterik ezin izan du egin Bernabeun Brujasen kontra (2-2). Belgikako taldea 0 eta 2 aurreratu da markagailuan lehen zatian. Aitzitik, talde zuriak erreakzionatu egin du atsedenaldiaren ostean, eta Ramosek eta Casemirok buruz sartutako golekin puntu bat bereganatu ahal izan du. Une honetan, madrildarrak A multzoko azken lekuan daude kokatuta puntu bakarrarekin; dena den, sailkapeneko bigarren tokia ez dute urruti, puntu bateko aldea soilik baitago bien artean.
Gaueko beste emaitza batzuk errepasatuz gero, Juventusek, Manchester Cityk eta Paris Saint-Germainek euren nagusitasuna azaldu dute Bayer Leverkusenen (3-0), Dinamo Zagreben (2-0) eta Galatasarayren (0-1) aurrean, hurrenez hurren.
2. jardunaldiko emaitzak A, B, C eta D multzoetan:
A multzoa
Real Madrid 2–2 Brujas [Sergio Ramos (55') eta Casemiro (85') | Dennis (9' eta 39')]
Galatasaray 0–1 Paris Saint-Germain [Icardi (52')]
B multzoa
Tottenham 2–7 Bayern [Son (13') eta Kane, de penalti (60') | Kimmich (15'), Lewandowsky (45' eta 87'), Gnabry (53', 55', 83' eta 88')]
Izar Gorria 3–1 Olympiakos [Vulic (63'), Milunovic (87') eta Boakye (90') | Semedo (37')]
C multzoa
Atalanta 1–2 Shakhtar Donetsk [Zapata (28') | Moraes (41') eta Taison (95')]
Manchester City 2–0 Dinamo Zagreb [Sterling (66') eta Foden (95')]
D multzoa
Juventus 3–0 Bayer Leverkusen [Higuain (17'), Bernardeschi (60') eta Cristiano Ronaldo (89')]
Lokomotiv Mosku 0–2 Atletico [Joao Félix (48') eta Thomas (58')]
