Reala
8 puntu
Reala, BBVA Ligako azken sailkatua
Erredakzioa
Talde txuri-urdinak puntu bakarra eskuratu du azken zazpi jardunaldietan. Egoera kezkagarria da.
Reala da BBVA Ligako azken sailkatua Getaferen garaipenaren ondorioz (3-2 Atletico Madrili). Donostiarrak 20. postuan dira 8 punturekin, Granada, Racing eta Sporting taldeek baino bat gutxiagorekin, hain zuzen ere. Zaragozak (16.), Mallorcak (15.) eta Getafek (14.) hamar puntu dituzte.
Montanierren taldea bolada txarrean murgilduta dago. Irailaren 20an, Granadaren aurka Anoetan, eskuratu zuen bere azken garaipena (1-0). Ondoren, Mallorca (2-1), Athletic (1-2), Zaragoza (2-0), Levante (3-1), Real Madril (0-1) eta Rayo Vallecano (4-0) taldeen kontra galdu du. Azken zazpi jardunaldietan puntu bakarra batu du, Getaferen aurka (0-0).
Asteburu honetan ez da Ligarik jokatuko, selekzioen txanda izango baita. Realaren hurrengo aurkaria sailkapen nagusian 7. postuan dagoen Espanyol izango da. Hil edo biziko neurketa izango da Donostiako taldearentzat.
