Reala
Denboraldi batez
Gorosabelek kontratua berritu du Realarekin, 2024ra arte
Erredakzioa
Andoni Gorosabel klub txuri-urdinarekin lotzen zuen aurreko kontratua 2023an amaitzen zen; beraz, denboraldi batez luzatzeko akordiora iritsi dira bi aldeak, 2024ko ekainaren 30era arte.
Andoni Gorosabelek kontratua berritu du Realarekin 2024ko ekainaren 30era arte. Hala jakinarazi du klubak astearte honetan. Duela egun gutxi, Robin Le Normandek ere berritu zuen kontratua.
2023an amaitzen zen Gorosabelek Realarekin zuen kontratua, eta denboraldi batez luzatzeko akordiora iritsi dira bi aldeak. 2017an egin zuen debuta lehen taldearekin, eta pozik azaldu da Realean jarraituko duelako.
"Hona iristea ez da erraza, lan asko egin behar baita aukera izateko. Klub honetan aurrerapausoak ematen jarraitu nahi dut, eta taldeak zekarren dinamika onari jarraipena ematea da helburua", adierazi du Gorosabelek Realaren webgunean.
Datorren denboraldian taldean jarraitzea ziurtatuta ez duten jokalariak ere baditu Realak. Badirudi David Zurutuzak ez duela jarraituko, kontratua amaitzen baitzaio. Martin Odegaard Real Madrilek utzita dago, eta Miguel Angel Moya atezainaren jarraipena ere kolokan dago.
