Realak hiru aldiz orekatu du markagailua eta puntu bat lortu du Coruñan (3-3)

Realak merezimendu handiko puntua atera du Abegondoko Kirol Hiritik (3-3), markagailuan hiru aldiz atzetik joan ostean. Izan ere, Ainize Barea Nuñez 'Peke' aurrelari bizkaitarrak hiru gol erdietsi ditu Deportivoren mesedetan.

Bere garaian denboraleagatik bertan behera geratu zen Primera Iberdrolako hamalaugarren jardunaldiari zegokion neurketan, lehen ordu laurdenerako jarri da irabazten Deportivo, Pekeren bidez. Hala ere, gutxi iraun die pozak galiziarrei, Nahikarik neurketa orekatu baitu lehen zatiko erdialdera iritsi aurretik.

Ordu erdia bete eta gero, Coruñakoak berriro agintzeari ekin diote, Pekeren bigarren golarekin. Aurrelaria bakarrik geratu da Adrianaren aurrean (Mariasun Quiñonesen ordez aritu da gaurkoan), baina ez du asmatu bere estreinako ahaleginean; dena den, atezainaren aldaratzea baliatu du bigarrena erdiesteko.

Bigarren zatian, Donostiako taldeak etxekoek atzealdean egindako huts bat aprobetxatu du bigarrenez lehia parekatzeko, Marta Cardonaren zuhurtziaren eskutik.

Handik gutxira, jokalari txuri-urdinak penaltia eskatu du, area barruan heldu diotelako, baina txartel horia atera diote bere protestengatik. Ondoren, Deportivo aurretik jarri da hirugarren aldiz, Pekeri esker berriro ere. Orduko horretan, Michelle Romero venezuelarraren jaurtiketaren aurrean atezainak egindako geldiketaren alderatzea jaso du, hat-tricka osatzeko.

Aitzitik, amaierarako bost minuturen faltan, Realak behin betiko berdinketa erdietsi du, Ceciliak area kanpotik sartutako gol ikusgarri baten bitartez.

Fitxa teknikoa:

Deportivo Abanca: Sullastres, Iris, Romero (Romero, 61. min), Merino (Teresa, 11. min), Athenea, Kika (Gaby, 61. min), Nuria, Mendez, Bedoya, Peke, Cris (Patri, 86. min).

Reala: Adriana, Lucia, Etxezarreta, Mendoza, Iraia, Maddi, Palacios (Roda, 67. min), L. Baños, N. Eizagirre (Cecilia, 78. min), M. Cardona (Manu, 78. min), Nahikari (Olaizola, 43. min).

Golak: 1-0: Peke (penaltiz), 19. min. 1-1: Nahikari, 21. min. 2-1: Peke, 30. min. 2-2: Cardona, 50. min. 3-2: Peke, 60. min. 3-3: Cecilia, 85. min.

Epailea: Sanchez Miguel. Txartel horiak: Nuria eta Iris (Deportivo); Etxezarreta eta Cardona (Reala).