Malaga-Reala, (1-2): Garaipen garrantzitsua txuri-urdinentzat

Lehen zatia nahiko berdindua izan da. Bi taldeei asko kosta zaie gol aukera argiak sortzea hasierako minutuetan. Lehen gol aukera 14. minutuan etorri da. Malagak gol aukera pare gabea izan zuen, baina lehenengo Bravok eta ondoren atepetik Elustondok malagarren lehen gola eragotzi zuten. Minutu gutxi barru Eliseuren jaurtiketa langa urratuz kanpora joan zen.

Realaren erantzuna 25. minutuan etorri zen. Griezmannek area barruan kontrola egin eta bere jaurtiketa gurutzatuegi kanpora joan zen. Pixkanaka Reala erasoan hobeto aritu zen eta arrisku gehiago sortzen zuen. Horrela, 43. minutuan Griezmannek 0-1ekoa sartu zuen Joseba Llorenteren pase dotorea hartu eta Arnau gaindituz. Realaren aldeko 0-1ekoarekin iritsi zen partida atsedenaldira.

Bigarren zatiaren hasieran Malaga erasokor zelairatu zen, baina Reala sendo mantendu zen defentsa lanean minutu horietan. 55. minutuan Joseba Llorentek 0-2koa ezarri zuen markagailuan buruz Xabi Prietoren erdiraketa sare barrura bidalita.

0-2koarekin lasai aritu zen Reala azken ordu laurdenera arte. 75. minutuan De La Bellak penalti inozoa egin zuen Sebasi area barruan falta eginez. Apoñok jaurti zuen penaltia eta Bravok gola eragotzi zuen erantzun on batekin. Bi minutu beranduago, ordea, Malagak 1-2koa sartu zuen Juanmiren bitartez.

Malagak gola sartu ondoren sofrikario galanta bizi izan zuen Realak, baina nola edo ahala emaitzari eustea lortu zuen talde txuri-urdinak eta azkenean garaipena lortu zuen 1-2ko emaitza horrekin.

Horrela bizi izan dugu Realaren garaipena eitb.com-en.