Xabi Prieto (Reala): "Une oso onak bizitzen ari naiz"

Aldagelatik kanpo zilegi da kaiola txoria baino lehen erostea. Ez ordea barruan. Hori da Diego Rivasek nabarmendu duena gaur Zubietan. "Celtak ez du ezer jokoan izango multzoaren helburua kontutan hartuz. Hala ere, norberaren egoera oso ezberdina da eta askok bestelako motibaziorik izango dute, kontratu berria esaterako. Baloia ongi erabiltzen duen taldea izateaz gain, presioaren zamarik gabe etorriko dira, beraz, larrutik ordainduko genukeen kontzentrazio falta. Zaletuen pare egon behar dugu igandean".

Xabi Prietok ere hankak lurrean dauzka, baina ez du ukatzen ezti momentuak dastatzen ari denik. "Bigarren mailako urteak latzak izaten ari dira. Aurten egia da, hasiera-hasieratik goiko postuetan sartu garenez, samurragoa izaten ari dela. Lehen taldera igo nintzenetik esan daiteke asterik bereziena izateaz gain, unerik politena ari naizela bizitzen".

Berdeguneko lanari dagokionez, Javi Ros harrobiko jokalariak nagusiekin entrenatu du denboraldiko bigarren erdia Eibarren jokatu eta gero. Mandalunizek bestalde, azterketa bat egin behar zuela eta ez da Zubietan izan. Zelaia jubenilak hartu dio lekukoa. Hurrengo bi saioak ateak itxita egingo dituzte txuri-urdinek. Aurrenekoa bihar goizean Anoetan, hamarretatik aurrera.