Gorantz doan Realak eta sendo dabilen Osasunak indarrak neurtuko dituzte Reale Arenan

Realak eta Osasunak EA Sports Ligako 11. jardunaldiko derbia jokatuko dute igande honetan, urriaren 27an, Reale Arenan, 21:00etan. Bi taldeak oso antzeko egoeran daude txapelketan, taularen erdian kokatuta -zortzigarren Osasuna eta hamabigarren Reala- eta hiru puntuko aldearekin bakarrik bien artean.

Txuri-urdinek ez zuten Liga hasiera ona izan, baina badirudi pixkanaka Imanol Alguacilek jokoarekin adiskidetzeko tekla aurkitu duela eta azken partidetan hobekuntza nabarmena nabaritu da, azken hiru jardunaldietan bi garaipen eta berdinketa bat lortuta.

Gorritxoak, berriz, Vicente Moreno entrenatzaile berriaren aginduetara, irregularragoak izan dira. Barça jipoitzea lortu zuten, baina Getaferen aurka berdindu eta Betisen aurka galdu egin zuten. Hala ere, Europako postuak lortzeko borrokan jarraitzen dute.

Gauzak horrela, Realaren garaipenak 15 punturekin Osasuna berdintzea ekarriko luke, irabaztea ezinbestekoa izango delarik Osasunarentzat Europarako lehian jarraitu nahi badu. Euskal derbi hau nola bukatuko den bihar jakingo da, 21: 00etatik aurrera.