Athleticek bereganatu du Eibarren aurkako Ipuruako derbia, luzapenean (1-2)

Eibar eta Athletic aurrez aurre aritu dira F Ligako 6. jardunaldiari zegokion neurketan, eta zuri-gorriek eskuratu dute garaipena Ipurua futbol-zelaian jokatutako euskal derbian, 1 eta 2, azken hatsean Irene Oguiza durangarrak sartutako gol baten bidez.

Bilbotarrek azkar hartu dute aurrea markagailuan, 10. minutua bete orduko, Clara Pinedok area kanpotik sartutako gol ikusgarri bat dela medio. David Aznarren taldeak sendoago jardun du lehen zatiko parterik gehienean, azken aldera armaginek lehiari neurria hartu badiote ere. Hala, azken minutuetan zenbait hurbilketa arriskutsu izan dituzte, eta horietako batean Ane Campos Adriana Nanclares atezainaren aurrean geratu da, baina bere erremate behartua kanpora atera da.

Bigarren zatian etxekoak hobeto zelairatu dira, presioa areagotu eta erasoari begira jarraitu dute. Margheritta Monnecchi italiarra gola erdiesteko zorian izan da 53. minutuan, Nanclaresek luze bota nahi zuen baloi bat Eibar taldeko jokalariaren aurka jo duenean, baina baloi hori ere hondoko marratik atera da, atetik oso gertu.

Etxekoen berdinketaren gola handik minutu batzuetara iritsi da (69. min), zelairatu berria zen Arene Altonagaren eskutik. Leioako erdilariari area aurrean heldu zaio baloia, eta haren jaurtiketa apartari ezin izan diote erantzunik eman ez Nanclares bilbotarren atezainak, ezta Nerea Nevado atzelariak ere.

Norgehiagokaren azken txanpan, etxekoak garaipenaren bila saiatu dira, eta, Athleticek, ostera, nahikoa zuen eibartarren ahaleginak eragoztearekin. Horietako batean, ezker hegaletik egindako barneraldi batean, Laura Caminok langara bidali du baloi bat erdiratzen saiatu denean.

Hala, derbia berdinketarekin bukatuko zela zirudienean, zuri-gorrien gola iritsi da, geldikako jokaldi batean. Nevadok falta bat atera du eskuin hegaletik, eta Irene Oguizak buruz baloia sare barrura bidali du. Modu horretan, zuri-gorriek garaipen batekin ospatu dute euren historiako 700. neurketa ofiziala.