Futbola
Kontratua luzatu du
Unai Emeryk luzatu egin du Aston Villarekin duen kontratua, 2027ra arte
EITB MEDIA
Hondarribiarrak 2022ko urrian sinatu zuen Ingalaterrako klubarekin; orduan, Aston Villa hamazazpigarren zebilen Premier Leaguen. Bera entrenatzaile, Birminghameko taldea Konferentzia Ligarako sailkatu zen, eta, egun, Txapeldunen Ligako postuan eta Konferentzia Ligako finalerdietan dabil.
-
Unai Emery, Aston Villak apirilean jokatutako partida batean. Argazkia: EFE.
Unai Emery entrenatzaile gipuzkoarrak luzatu egin du Aston Villarekin duen kontratua, 2027ra arte, Ingalaterrako klubak asteartean iragarri duenez.
Hondarribiarrak 2022ko urrian sinatu zuen Erresuma Batuko klubarekin; orduan, Aston Villa hamazazpigarren zebilen Premier Leaguen. Bera entrenatzaile, baina, Birminghameko taldea Konferentzia Ligarako sailkatu zen, 2022-23 denboraldia amaituta, eta, egun, 2023-24 denboraldian, Txapeldunen Ligako postuan dabil Premier Leaguen eta Konferentzia Liga irabazteko lehian da, Europako txapelketako finalerdietarako sailkatuta baitago.
"Asko ari gara gozatzen Aston Villan, zaleekin, Zuzendaritzarekin, teknikariekin, eta jokalariekin; handiak dira azken horiek, harro gaude haietaz", adierazi du Emeryk. Kontratua luzatuta, uxatu egin da euskal entrenatzailearen gaineko edozein zurrumurru; izan ere, hainbat klub handi, Bayern Munich kasu, entrenatzaile bila dabiltza, hurrengo denboraldiari begira.
