Osasuna
Errege Kopa
Osasunak aurrera egin du Kopan, Tenerife 1-2 menderatuta
L.U. | EITB MEDIA
Nafarroako taldeak Heliodoro Rodriguez Lopezen hartu du mendean Tenerife. Horrela, gorritxoak final-zortzirenetarako aurkariaren zain dira jada.
Vicente Morenoren taldea Errege Kopako hurrengo kanporaketarako sailkatu da Heliodoro Rodriguez Lopez futbol zelaian etxeko taldea 1-2 garaituta. Lehen zatian, gorritxoak nagusitu dira, eta geldikako jokaldietan bi gol egin dituzte, oso antzekoak; bigarrenean, berriz, Tenerife izan da nagusi, lehen zatiko azken txanpan Leonek egindako golak berpiztu egin baitu.
Neurketaren lehen minutuetan, etxeko taldeak erritmo azkarra ezarri arren, Osasuna aurkariaren zelaira iritsi da, eta 7. minutuan heldu da Nafarroako taldearen gola. Ruben Garciak kornerretik baloia lehen zutoinean jarri du, Herrando sartu da, eta Teneriferen ate barrura bidali du baloia (0-1).
Hortik aurrera, gorritxoen nagusitasuna erabatekoa izan da. 26. minutuan iritsi da Vicente Morenok zuzentzen duen taldearen bigarren gola. Moncayolak kornerretik baloia area barruan jarri du, eta Jose Leonek bere atean sartu du (0-2). 34. minutuan, bestalde, Budimirren gol bat baliogabetu dute jokoz kanpokoa adierazita.
Lehen zatiko azken jokaldian, baina, gutxien espero zen jokaldian, Leonen urruneko jaurtiketa batean, etxeko taldeak aldea murriztu du atsedenaldira 1-2ko emaitzarekin joateko.
Atsedenaldiko hamabost minutuek edo Alvaro Cerveraren errietek fruituak eman dituzte, uharteko taldea itxura berrituta zelairatu da, eta Sergio Gonzalezek 47. minutuan ia markagailua berdintzea lortu du falta jaurtiketa batean.
Azken txanpara arte itxaron behar izan dute gorritxoek gol aukera bat izateko. 82. minutuan, Budimir saiatu da areaz kanpotik egindako jaurtiketa batekin, baina Badiak geldiketa bikaina egin du, eta geratzen zen denboran ez da beste aukerarik sortu. Horrela, Osasuna Errege Kopako final-zortzirenetan arituko da.
Fitxa teknikoa:
1 - CD Tenerife: Edgar Badia; David Rodriguez, Jose Leon, Sergio Gonzalez, Medrano (Ruben Alves, 73. min); Bodiger, Aarón (Angel, 63. min); Waldo (Alassan, 46. min), Cantero (Marlos, 46. min), Teto (Diarra, 73. min); eta Enric Gallego.
2 - CA Osasuna: Aitor Fernandez; Areso (Iker Muñoz, 78. min), Boyomo, Herrando, Ruben Peña (Nacho Vidal, 65. min); Moncayola (Juan Cruz, 90 min+2), Lucas Torro, Oroz; Abel Bretones, Budimir (Raúu, 90. min+2) eta Ruben Garcia.
Golak: 0-1, 6. min: Herrando. 0-2, 24. min: Jose Leon, bere atean. 1-2, 42. min: Boyomo, bere atean.
Epailea: Juan Martínez Munuera. Txartel horia atera die Marlos (55. min), Ángel (78. min) eta Alassan (90. min+1) Tenerife taldeko jokalariei, eta Moncayola (42. min), Boyomo (47. min) eta Budimir (90. min+2) Osasunako jokalariei.
