Osasunak Bartzelona menderatu du etxean (4-2), partida bizi batean

Porrotik gabe Sadarrera iritsi den Bartzelonari irabazi dio Osasunak larunbat honetan, EA Sports Ligako 8. jardunaldiko partidan. Vicente Morenoren taldea 18. minutuan aurreratu da Budimirren burukada bati esker, katalanen garaipen-bolada eten duen partidaren norabidea ezarriz.

Osasunak intentsitate handiarekin hasi du partida, zelaian ondo kokatuta, banakako lehiak irabaziz eta lehen minutuetatik arrisku aukerak sortuz. Lehen abisua 15 minutura iritsi da, Aresok baloi bat berreskuratu, aurkariaren area aldera gerturatu eta jaurtiketa indartsu bat egin duenean. Handik gutxira, gorri-urdinek erreakzionatu nahian zeudela, Budimirrek aurretik jarri du Osasuna burukada batekin, Bryan Zaragozak ezker hegaletik egindako erdiraketa aprobetxatuta (1-0).

Golak bultzatuta, nafarrek ez dute etsi eta, hamar minutu geroago, abantaila handitu dute. Oraingo honetan, Bryan Zaragoza izan da, Iñaki Peña atezainarekin buruz buru aritu ondoren, 2-0ekoa sinatu duena.

Lehen zatiko azken minutuetan, bisitariek presioa egin dute, baloiaren jabetza luzatuz eta atsedenaldira iritsi aurretik aldea murrizten saiatuz. Nafarrek, ordea, ez dute sufritu, eta bi goleko aldearekin iritsi dira aldagelara.

Bigarren zatian, Bartzelona aldeak murrizteko gogo biziekin atera da jokora, eta 53. minutuan gertu egon da Lewandowskiren jaurtiketa indartsu batekin. Minutu bat geroago, ordea, Pau Victorrek ezustean harrapatu du atezaina distantzia luzeko jaurtiketa batekin; Sergio Herrerak oreka galdu du atzerantz korrika eginez, lurrera erori da eta ez du baloia gelditzea lortu, eskuetatik ihes egin ondoren, sare barrura sartu baita (2-1).

Gorritxoek erreakzionatu egin dute, eta birritan eskatu dute penaltia bisitarien area barruan erori ostean. Budimirrek ere hirugarren gola egiteko zorian egon da eskuineko zutoinetik gertu joan den jaurtiketa batekin. Bien bitartean, Bartzelonakoek ez dute intentsitatea jaitsi, eta berdinketa lortzeko hainbat aukera sortu dituzte.

70. minutuan, Osasuna Bartzelonaren arean sartu da berriro, eta Sergi Dominguezek Budimir lurrera bota du. Oraingoan, epaileak ez du zalantzarik izan eta zigorrik handiena ezarri du. Budimir bera arduratu da penaltia zehaztasunez gauzatzeaz, gorritxoen aldea handituz (3-1).

Hiru golekin konformatu beharrean, Abel Bretonesek partida erabakita utzi nahi izan du 85. minutuan. Lamine Yamali baloia lapurtu ostean, ezkerkada indartsu bat bota du distantzia luzetik, Iñaki Peña ezustean harrapatu duena (4-1).

Laugarren gola izan arren, bisitariek ez dute amore eman eta azken ahaleginean markagailua irauli nahi izan dute. Lamine Yamalek aldea murriztu du 90. minutuan, 4-2koa jarriz, eta luzapeneko zazpi minutuetan, Bartzelonak presioa egin du etengabe, nafarrek hiru puntuak eskuratzea saihestu nahian. Baina ez dute lortu.

Fitxa teknikoa

4 – Osasuna: Herrera; Areso (Herrando, m. 84), Catena, Boyomo, Juan Cruz (Nacho Vidal, m. 84); Torro; Ruben Garcia (Peña, m. 59), Aimar, Pablo Ibañez, Bryan (Bretones, m. 77); Budimir (Raul, m. 77).

2 – Bartzelona: Peña; Kounde, Cubarsi, Domínguez, Martin (Balde, m. 70); Pedri, Eric, Torre (Raphinha, m. 59); Pau Victor (Yamal, m. 59), Lewandowski (Casado, m. 70), Ferran.

Golak: 1-0, m. 18: Budimir. 2-0, m. 28: Bryan. 2-1, m .53: Victor. 3-1, m. 72: Budimir penaltian. 4-1, m. 85: Bretones. 4-2, m. 90: Yamal.

Epailea: Cuadra Fernandez.