Osasunak porrot mingarria jaso du Leganesen aurka Caparrosen debutean

Osasunak porrot mingarria jaso du Leganesen aurka (2-0) Butarque zelaian eta talde gorritxoaren egoera kezkagarria da salbazioa lortzeko aurkari zuzen baten aurka galdu baitu astelehen honetan. Caparrosek porrotarekin eta joko oso kaskarrarekin ekin dio bere ibilbideari Osasunan.

Lehen zatian Leganes izan da jaun eta jabe. Hasieratik partidaren bila atera da Asier Garitanok zuzentzen duen taldea eta bosgarren minutuan markagailuan aurrea hartzea lortu du. Ricok hegaletik erdiraketa egin, Osasunako defentsak ez du aldentzerakoan asmatu eta Rober Ibañezek 1-0ekoa sartu du Nauzet gaindituta. Golaren ostean talde gorritxoa noraezean ibili da, eta Leganesek beste gol bat sartu duen arrean, epaileak baliorik gabe utzi du, Luciano jokoz kanpo egon delako. Osasunak lehen 45 minutuetan ezer gutxi egin du erasoan, aipagarriena Roberto Torresek oso desbideratuta egin duen jaurtiketa bat izan da. Atsedenaldira iritsi orduko beste bi abagune gehiago izan ditu Leganesek: 33. minutuan Lucianoren erremate ona kanpora joan da, eta 43. minutuan Nauzet atezainak etxeko taldearen bigarren gola eragotzi du Gabrielek egindako falta jaurtiketa hankarekin atepetik aterata.

Bigarren zatian ez da Osasunaren jarrera ezta jokoa ere aldatu. Leganesek jarraitu du baloiaren jabe izaten eta Asier Garitanok zuzentzen duen taldeak izan ditu abagune onenak. Atsedenaldiaren ondorengo lehen aukera etxekoentzat izan da, baina Nauzetek gola eragotzi du Lucianoren jaurtiketari erantzun ona emanda. Jarraian, Osasunak partidan zehar izan duen abagune bakarra eduki du, baina Oierrek Serantes atezainaren eskuetara bidali du errematea, indarge. Gorritxoek abagunea izan eta hurrengo minutuan Leganesek bigarren gola sartu du. Rober Ibañezek egin du 2-0ekoa Madrileko taldearentzat eta norgehiagoka erabakita utzi du. Amaierako minutuetan Caparrosek zuzentzen duen taldeak ez du aldeak murizteko abagunerik sortu eta Leganesek arazo gehiegirik gabe eskuratu ditu hiru puntuak.

Fitxa teknikoa:

2 - Leganes: Serantes; Bustinza, Insua, Mantovani, Diego Rico (Victor Diaz, min.77); Timor, Alberto Martin; Rober Ibañez (Unai Lopez, min.85), Szymanowski (Machís, min.46), Gabriel; eta Luciano.

0 - Osasuna: Nauzet; Tano, David Garcia, Unai Garcia, Fuentes; Oier, Fausto Tienza (Riviere, min.46); Berenguer, De las Cuevas (Causic, min.57), Roberto Torres (Olavide, min.73); eta Sergio Leon.

Golak: 1-0, m.6: Rober Ibañez. 2-0, min.56: Rober Ibañez.

Epailea: Ignacio Iglesias Villanueva.