Osasunak bi puntu galdu ditu azken minutuetan

Osasunak kolpe latza hartu du hurrengo denboraldian lehen mailan aritzeko bidean. Gorriek eskura izan dute garaipena Valentziaren aurka jokatutako partidan, Oriol Rierak lehen zatian gola sartu ondoren, baina aurkariek berdinketa lortu dute bukaerarako zortzi minutu falta zirela (Jonasek egin du 1-1ekoa).

Nafarrek 35 puntu dituzte orain, eta dagoeneko bost partida daramatzate etxean garaipenik lortu gabe. Valentziak buruan Europa Ligako finalerdiak dituela iritsi da Iruñera, baina hori ez da oztopo izan eta etekina atera diete Osasunak emandako erraztasunei.

Iruindarrek aukera onak izan dituzte lehen zatian. De las Cuevasek aukera garbia izan du area barruan, baina motel aritu da jaurtiketa egitean. Oriol Rierak, ordea, ez du barkatu, eta gola egin 19. minutuan Guaitaren aldaratzea aprobetxatuta.

Osasunari alde jarri zaio neurketa, baina Valentzia eroso aritu da eta arriskua sortu du nafarren area inguruan. 41. minutuan, epailak ez du penaltia adierazi Marc Bertranek area barruan baloia eskuarekin ukitu duenean.

Valentziaren berdinketa

Bigarren zatia hasi eta gutxira, Javi Graciaren taldeak bigarrena sartzeko aukera izan du, baina Roberto Torresek area barrutik egindako jaurtiketak zutoina jo du.

Jokoaren jabetza Valentziaren izan da, eta horren ondorioz iritsi da Jonasen berdintzeko gola.

Fitxa teknikoa:

1 - Osasuna: Andrés Fernández; Marc Bertrán, Arribas, Miguel Flaño, Damià; Raoul Loé, Silva; Cejudo (Oier, 72. min), De las Cuevas (Acuña, 86. min), Roberto Torres (Armenteros, 79. min); eta Oriol Riera.

1 - Valentzia: Guaita; Pereira, Vezo (Piatti, 77. min), Mathieu, Bernat; Keita, Parejo; Feghouli (Jonás, 57. min), Vargas (Araujo, 66. min), Fede Cartabia; eta Paco Alcácer.

Golak: 1-0, 19. min: Oriol Riera. 1-1, 82. min: Jonás.