Eibar
Errege Kopa
Reala final-zortzirenetan da; Eibar eta Alaves, kanpoan
Erredakzioa
Donostiarrek Oviedo gainditu eta Vila-realen aurka jokatuko dute. Eibarrek ezin izan du Getafe mendean hartu (1-2) eta arabarrak ere galtzaile atera dira Espanyolen aurka (1-0).
Realak Errege Kopako final-zortzirenetarako txartel lortu du, Anoetan Oviedori 2-0 irabazita. Donostiarren bi golak Finnbogasonek egin ditu, estreinakoz.
Partida txarra ikusi dute Anoetan bildu diren 9.000 zaleek. Igandeko derbian Athleticen aurka gertatu bezala, txuri-urdinek lehen zati ona egin dute, baina bigarrenean neurketaren kontrola galdu dute eta Oviedok arriskua sortu du donostiarren arean.
Ruben Pardo eta Yuri izan dira jokalaririk onenak, baina protagonista nagusia Finnbogason izan da. Islandiarrak egin ditu taldearen bi golak, eta gehiago sartzeko aukerak ere izan ditu. Lehenengoa, lehen zatiko 28. minutuan egin du; Pardok Herviasi eman dio baloia, eta honek Finnbogasoni utzi dio, islandiarrak baloia ate barruan sartzeko.
Bigarrena atsedenaldiaren ostean iritsi da. Islandiarrak Oviedoko atezainak egindako aldaratzea aprobetxatu du.
Asturiarrek ere aukerak izan dituzte gola egiteko, baina Rulli oso seguru egon da atepean.
Beraz, Realak poltsikan du final-zortzirenetarako txartela. Marcelinoren Vila-real gainditu beharko du orain, final-laurdenetara pasatzeko.
Fitxa teknikoa:
2.- Reala: Rulli; Aritz Elustondo, Ansotegi, Iñigo, Yuri; Gaztañaga, Rubén Pardo, Zurutuza (Prieto, 83. min); Canales, (Oyarzun, min. 70) Hervías eta Finnbogason (Iker Hernández, 83. min).
0.- Oviedo: Magunazelaia; Johannesson, Vila (Bautista, 68. min), David Fernández, Óscar; Sergio García, Omgba, Generelo, Eneko (Nacho, 82. min); Señé eta Cervero (Allyson, 55. min).
Golak: 1-0, 27. min: Finnbogason. 2-0, 62. min: Finnbogason.
Eibar eta Alaves, ezinean
Eibarrek eta Alavesek agur esan diote aurtengo Errege Kopari. Biek galdu dute, Getaferen erta Espanyolen aurka final-hamaseirenetan jokatutako itzulerako partidetan.
Armaginek miraria behar zuten Getafen hartutako 0 eta 3koa iraultzeko. Partidaren atarian Ipuruakoa 'gau magikoa' izan zitekeela zioen Gaizka Garitanok, baina azkenean ez da magiarik izan. Ezta gutxiagorik ere, Getafe jaun eta jabe izan baita hasiera-hasieratik.
Vigarayk 22.minutuan sartutako golak ia itxaropenik gabe utzi ditu armaginak. Banakako jokaldia egin eta arearaino sartu da Getafeko jokalaria, inolako oztoporik gabe.
Handik 12 minutura, 34.ean, Diego Castrok jaurtiketa ederra egin eta madrildarren bigarrena sartu du. Hortxe amaitu dira armaginen aukera apurrak.
Piovaccarik eibartarren gol bakarra egin du, bigarren zatian, berari egindako penaltia jaurtita. Azkenean, 1-2 Ipuruan, eta Getafek final-zortzirenak jokatuko ditu (kanporaketa 1-5eko emaitzari esker gaindituta).
Fitxa teknikoa:
1 - Eibar: Irazusta; Bóveda (Capa, 46. min), Ekiza, Dídac Vilá, Abraham (Piovaccari, 46. min); Dani Nieto, Errasti, Dani García (Lillo, 46. min), Javi Lara; Angel eta Lekic.
2 - Getafe: Codina; Vigaray (Freddy, 46. min), Naldo, Velázquez, Arroyo; Juan Rodríguez, Lacén (Babá, 73. min); Pedro León, Sammir, Diego Castro; eta Alvaro Vázquez (Roberto Lago, 65. min).
Golak: 0-1. 22. min. Vigaray; 0-2. 33. min. Diego Castro; 1-2. 54. min Piovaccari (penaltiz).
Alaves ere, kanporatuta
Alavesek Eibarren bide berari jarraitu dio eta Kopatik kanpo geratu da. Alberto Lopezen taldeak 1-0 galdu du Bartzelonan, Espanyolen aurka. Arabarrek ere ez zuten errona makala, Mendizorrotzan jokatutako joaneko partida 0-2 galduta.
Espanyolek neurketa erabakita utzi du 65. minutuan Jairok egindako golari esker. Aurretik jokoa kontrolpean izan dute Kataluniarrek, zelaian ondo kokatuta izan baitira eta arabarrek oso aukera gutxi izan dituztelako.
Orotara, 3-0 nagusitu da Espanyol, joaneko eta itzulerako emaitzak kontuan hartuta.
Fitxa teknikoa:
1 - Espanyol: Pau López; Javi López, Héctor Moreno, Raúl Rodríguez, Clerc (Jairo, 59. min); Abraham, Álex Fernández (Jordán, 71. min); Víctor Álvarez, Lanzarote, Mattioni (Montañés, 49. min) eta Stuani.
0 - Alaves: Goitia; Galán, Laguardia, Galilea, Raúl García; Sangalli, Llamas (Toribio, 76. min), Tejera (Juli, 68. min), Manu García; Barreiro eta Despotovic (Juanma, 68. min).
Gola: 1-0, 65. min: Jairo.
