Athleticek partida irauli du Vallecasen, Sancetek bi gol sartuta (1-2)

Athleticek 1-2 irabazi dio Rayo Vallecanori, gaur, Vallecasen jokatu duten EA Sports Ligako partidan. Neurketa galtzen hasi dute zuri-gorriek, baina bigarren zatian Ernesto Valverdek Oihan Sancet jarri du zelaian, eta jokalari nafarrak markagailua irauli du, bi gol ikusgarri sartuta.

Athleticek berezko duen bizitasunarekin jokatu du, eta Rayok goian egindako presioa gainditzen zuenean, arriskua sortzeko ahalmena izan du.

Hasieratik erritmo handiarekin aritu dira bi taldeak, eta Nico Williamsek lehen minutua bete orduko izan du gola sartzeko lehendabiziko aukera. Guruzetak pase ikusgarria eman dio, orpoz, baina Williamsek kanpora jaurti du baloia.   

Handik gutxira iritsi da Iñigo Perezen mutilen erantzuna, baina Isiren jaurtiketa arazorik gabe gelditu du Agirrezabalak.

Baloiaren jabetza Athleticek izan du, baina joan-etorriko neurketa izan da, eta Rayok urrats bat aurrera eman du, erasoko jokoa hegaletatik bideratuta, nahiz eta azken metroetan arrisku handirik sortu ez.

Halako batean, baina, Valverderen mutilek huts larria egin dute defentsan, Rayoko jokalariek egindako presioaren ondorioz, eta orduan egin du 1-0ekoa etxeko taldeak. Paredesek pase txarra eman dio Agirrezabalari, Ntekak lapurtu dio baloia eta atezainaren buru gainetik botata bidali du sarera.   

Gola jaso arren, Athleticek ez du jarrera aldatu eta partidan nagusi izaten jarraitu du. Bereak izan dira aukerari garbienak, baina Nicok, Guruzetak eta Yurik ez dute ate aurrean asmatu du. Aitzitik, Rayok barrura bidali du lehen zatian izan duen aukera on bakarra.

Informazio gehiago, laster.