Athleticek, bigarren zatian ondo jokatuta eta Paredesek gola sartuta, puntu baliotsua lortu du Erroman (1-1)

Athleticek berdindu egin du Erromarekin, 1-1, Italiako hiriburuko Estadio Olinpikoan, 2024-25 denboraldiko Europa Ligako liga faseko lehenengo jardunaldian, ostegun gauean. Artem Dovbykek, 32. minutuan, aurretik jarri du Erromako taldea, eta Aitor Paredesek, 86.ean, berdinketaren gola sartu du. Talde zuri-gorria ondo aritu da bigarren zatian, eta puntu baliotsua eskuratu du, sei urte eta erdiren buruan berriro nazioarteko txapelketa batean.

Agirrezabala zelairatu da atepean, eta, hasierako hamaikakoan, Ernesto Valverdek Gorosabel, Unai Gomez eta Djalo sartu ditu. Athleticek ondo ekin dio partidari, sendo zelai erdian, eta arriskua sortu du bi jokalditan: Iñaki Williamsek izan du abagune ona, Ruiz de Galarretaren pasea baliatuta, eta Paredesi apur bat goitik joan zaio burukada bat, korner batean. 20. minuturako, baina, Erromak hartu du baloiaren kontrola, eta presio handiagoa egiten hasi da.

32. minutuan, Artem Dovbykek aurretik jarri du Erroma. Italiako taldeko aurrelariak, Gironako jokalari ohia bera, buruz errematatu du, area barruan, Angeliñok ezkerretik egindako erdiraketa; aurretik, Dybalak kanpora jaurti du, etxeko taldearentzako aukera on batean. Athletic atsedenaldira joan aurretik ere erantzuten hasi da, eta Djalok, area ertzetik izandako falta batean, desbideratuta bota du baloia, lehen zatiko azken jokaldietako batean.

Julen Agirrezabalak geldiketa oso ona egin du, 54. minutuan, Souleren erremate bati erantzunez; gol aukera hori gorabehera, Athletic hobeto aritu da bigarren zatian, eta argiago kontrolatu du, berdinketaren bila. Nico Williams eta Berenguer irten dira berdegunera, erasoan, eta Iñaki Williamsi, 75. minutuan, kanpora joan zaio area ertzetik egindako eskuinkada bat.

Iñaki Williams, erasoko jokaldi batean. Argazkia: EFE.

86. minutuan, Athleticek berdinketaren saria jaso du. Estrategia jokaldi batean gauzatu du euskal taldeak gol hori; Alex Berenguerrek ezkerretik atera du, bigarren zutoinera, Unai Nuñezek, buruz, area txikira sartu du baloia, eta Aitor Paredesek, burukada on baten bidez, sareetara bidali.

Neurketako azken txanpan, Athleticek ez du estutasunik izan berdinketari eusteko, eta, hala, Valverderen taldeak merezita poltsikoratu du puntua Erroman. Nabarmentzeko modukoak dira, amaitzeko, Euskal Herritik Erromako Estadio Olinpikora joandako Athleticeko zaleak; izan ere, 2.500 zale baino gehiago izan dira zelaian, eta une oro bultzatu dute talde zuri-gorria. Deitoragarria izan da, hori bai, zale horietako gutxi batzuek bengala batzuk bota dituztela, partidan zehar. 

Fitxa teknikoa

1 - Erroma: Svilar; Mancini, Ndicka, Hermoso; Celik (Abdulhamid, 71. min), Kone (Paredes, min. 81), Cristante, Angeliño; Baldanzi (Pisilli, 63. min), Dybala (Soule, 46. min); Dovbyk (Shomurodov, 81. min).

1 - Athletic: Agirrezabala; Gorosabel (De Marcos, 69. min), Vivian (Nuñez, 80. min), Paredes, Yuri; Ruiz de Galarreta, Prados (Herrera, 60. min); Djalo (Nico Williams, 60. min), Unai Gomez (Berenguer, 69. min), Iñaki Williams; Guruzeta.

Golak: 1-0, 32. min: Dovbyk; 1-1, 86. min: Paredes.

Epailea: Georgi Kabakov (Bulgaria). Erromako Kone eta Athleticeko Gorosabel, Yuri, De Marcos eta Nico Williams zigortu ditu, txartel horia aterata.

Gertakizunak: Europa Ligako lehen jardunaldiko partida, Erromako Estadio Olinpikoan.